“Вечерний Брест” распавядае пра новы паварот у справе аб скрадзеных аўтамабілях, у якой фігуруюць былыя супрацоўнікі мытні і ДАІ. На тэрыторыю краіны незаконным шляхам па фіктыўных дакумэнтах трапіла больш за 50 аўтамабіляў, якія былі скрадзеныя ў краінах Эўропы. Дзяржаве нанесена страта ў 2 мільярды 206 мільёнаў. Абласная пракуратура апратэставала даволі мяккія прысуды, вынесены Маскоўскім раённым судом 22 абвінавачаным. Справу будзе разглядаць Берасьцейскі абласны суд.
“Сілавым структурам у кастрычніку далі надбаўку да заробкаў — 300 — 400 тысяч, а ў лістападзе адабралі. Наша выданьне робіць выснову, што была спроба, так бы мовіць, подкупу сілавых структур і падзяка за іх падтрымку на выбарах, а зараз умяшаўся такі нюанс, як ўсясьветны фінансавы крызіс, і гэту надбаўку адмянілі”.
“Вольнае Глыбокае”. Глыбоччына займае першае месца сярод сельскіх раёнаў Віцебскай вобласьці па колькасьці прадпрымальнікаў. У райцэнтры адбыўся бізнэс-сьняданак. Распавядае журналіст Уладзімер Скрабатун:
“Прыехала зь Віцебску кіраўніцтва грамадзкага аб’яднаньня „Асацыяцыя наймальнікаў і прадпрымальнікаў“. На бізнэс-сьняданак былі запрошаны глыбоцкія камэрсанты. Аднак ня ўсе з запрошаных прыйшлі, пабаяліся. А ўсяго ў Віцебскай вобласьці па стане на кастрычнік 2008 года 30170 прадпрымальнікаў, 6087 камэрцыйных структур, 251 прадпрыемства з замежнымі інвэстыцыямі”.
Сьветлагорскі “Ранак-плюс” уздымае праблему — як змагацца з даўжнікамі? У горадзе амаль 1300 сем’яў ня плацяць за камунальныя паслугі, а сума агульнай запазычанасьці больш за 500 мільёнаў рублёў, сёньня ў судзе знаходзіцца 110 пазоваў, 130 злосным неплацельшчыкам ужо адключылі ваду, амаль 800 — электраэнэргію.
Што рабіць, “Калі вас хочуць звольніць?” Комсомольская правда”в Белоруссии” дае карысныя парады, як паводзіць сябе ў складанай сытуацыі, калі працадаўца хоча разарваць кантракт, скараціць, звольніць па артыкуле.
