“Крый Божа, калі Расея паспрабуе зрабіць тое самае зь Беларусьсю”

Абодва выданьні ў асноўным пішуць пра адно і тое ж, але па-рознаму расстаўляюць акцэнты. FT, напрыклад, пачынае артыкул ад заўвагі, што Лукашэнка атрымлівае асалоду ад сваёй славы „апошняга дыктатара ў Эўропе”. Ня кожнаму выпадае гонар пасядзець за адным сталом з такой пэрсонай — такой заўвагай, паводле FT, Лукашэнка cустрэў абодвух журналістаў.

Але Лукашэнка зараз жа і паставіў пад сумнеў гэты свой тытул, кажучы: „Я буду рады, калі вы перадасьце людзям у Эўропе мае простыя словы: Я ня маю дыктатарскіх амбіцый, каб заставацца пры ўладзе, але я надзвычай залежны ад волі народу”.

Гаворачы пра блізкія парлямэнцкія выбары, Лукашэнка прызнаўся, паводле FT, што ён пайшоў на парушэньне беларускага заканадаўства, каб задаволіць патрабаваньні Эўразьвязу адносна выбарчых стандартаў. Канкрэтна, прэзыдэнт парушыў закон, прымушаючы выбарчыя камісіі ўключыць у іх большую колькасьць прадстаўнікоў апазыцыі.

Лукашэнка таксама абвінаваціў Захад у „двайных стандартах”, даючы зразумець, што Расеі, у якой выбары таксама праходзяць не без заганаў, удаецца пазьбегчы крытыкі і санкцый.

Беларускі прэзыдэнт заявіў, што яму ўсё роўна, здыме Захад ці не візавыя санкцыі супраць яго ды іншых беларускіх афіцыйных асобаў, але адначасова заклікаў да спрашчэньня асабістых і дзелавых кантактаў для шараговых беларусаў.

Лукашэнка яшчэ раз нагадаў, чым Захад абавязаны Менску: Беларусь спыняе кантрабанду наркотыкаў на Захад; Беларусь зьяўляецца надзейным партнерам у транзыце расейскага газу і нафты; Беларусь дае свабодны праезд вайсковам грузам, якія патрэбныя Захаду для апэрацый ва Аўганістане. „Ці можаце сабе ўявіць, што нямецкаму канцлеру маглі б забараніць уваход у беларускую паветраную прастору, калі ён ляціць у Маскву?” — цытуе беларускага прэзыдэнта FAZ.

Лукашэнка сказаў, што ён добра служыць сваёй краіне, — падмацоўваючы гэтае сьцьвярджэньне дадзенымі аб росьце беларускага ВУП — і заявіў, што сваю пасаду пакідаць не зьбіраецца, спасылаючыся на тое, што „англійская каралева” знаходзіцца пры ўладзе ўжо даўно.

Паводле FT, Лукашэнка ўсьведамляе сабе, што ён выклікаў раздражненасьць Масквы, не прызнаючы незалежнасьці Абхазіі і Паўднёвай Асэтыі. Але ён не выключае, што зробіць так у будучыні, калі гэтае пытаньне будзе разглядаць будучы парлямэнт.

Лукашэнка назваў „абсалютна дурнаватым” дапушчэньне, што расейская інтэрвэнцыя ў Грузіі ўстанаўляе небясьпечны прэцэдэнт для Беларусі. ”Крый Божа, калі Расея паспрабуе зрабіць тое самае зь Беларусьсю. У такім неверагодным выпадку Эўропа мела б поўнае права супрацьставіцца Расеі, не абмяжоўваючы сябе ў мэтадах і рычагах” — сказаў Лукашэнка.

FAZ завяршае свой артыкул рэфлексіяй, што Лукашэнка цяпер, хутчэй за ўсё, спрабуе прамацаць Расею і Захад, што ён можа атрымаць ад кожнага з бакоў за (не)прызнаньне Абхазіі і Паўднёвай Асэтыі. „Магчыма, размова ідзе пра зьняцьцё напружанасьці з Захадам і эканамічную дапамогу адтуль. А, магчыма, ён мае надзею атрымаць новы стабілізацыйны крэдыт ад Максвы — гаворка ідзе пра два мільярды даляраў — і адтэрмінаваньне павышэньня коштаў на расейскія энэрганосьбіты” — заключае FAZ.