Лінкі ўнівэрсальнага доступу

Суды не разглядаюць скаргі на фармаваньне выбарчых камісіяў


Між тым апазыцыя, якую амаль не дапусьцілі ва ўчастковыя камісіі, заяўляе, што менавіта там могуць адбыцца масавыя фальсыфікацыі.


Назіральнік Беларускага Хэльсынскага камітэту з Капыля Віктар Дашкевіч высьвятляў, як фармаваліся 10 камісій у сваім раёне і выявіў, што 29 чалавек былі ўключаныя ў склад камісій з парушэньнем Выбарчага кодэксу — іх вылучылі ад працоўных калектываў, у якіх тыя не працавалі. Спадар Дашкевіч падаў у сувязі з гэтым заяву ў пракуратуру. Там пацьвердзілі ягоныя высновы і прадпісалі райвыканкаму ліквідаваць парушэньні. Райвыканкам адмяніў сваю ранейшую пастанову аб фармаваньні выбарчых камісіяў і празь нейкі час выдаў новую зь іншым складам камісіяў, сьведчыць спадар Дашкевіч:

“А насамрэч там быў ранейшы склад камісій, толькі ўжо не ад працоўных калектываў, а быццам іх вылучалі людзі шляхам збору подпісаў”.

Віктар Дашкевіч абскардзіў і гэтае рашэньне, бо паводле закону ўлады мусілі замяніць сябраў камісіяў, якія выбылі з іх складу. Ён падаў заяву ў раённы суд. Але Капыльскі райсуд адмовіўся разглядаць скаргу, бо палічыў, што яна не падлягае яго кампэтэнцыі. Рашэньне раённага суду спадар Дашкевіч абскардзіў у абласным. Апошні мае разгледзець скаргу 22 верасьня. Спадар Дашкевіч таксама напісаў чарговую заяву ў пракуратуру, цяпер чакае адказу і зьбіраецца давесьці сваю справу да канца. Дзеяньні ўладаў ён тлумачыць наступным чынам:

“Мясцовыя чыноўнікі зацікаўленыя, каб гэтыя самыя людзі знаходзіліся ў камісіях, таму што яны там ужо гадамі, ня першы раз у выбарах удзельнічаюць, яны ўжо ведаюць устаноўку, як трэба іх праводзіць, як трэба лічыць галасы і пісаць пратаколы”.

Вядомы беларускі праваабаронца Гары Паганяйла сьведчыць, што адмова судоў разглядаць скаргі на парушэньні пры фармаваньні выбарчых камісіяў - звычайная справа.

Падобны адказ прыйшоў і на скаргу старшыні АГП і актывістаў партыі, якіх не ўключылі ва ўчастковыя камісіі ў Цэнтральным раёне Менску. Судзьдзя Цэнтральнага раёну Ясіновіч таксама адмовілася разглядаць скаргу “з-за яе непадведамаснасьці” суду і ў сваім адказе напісала, што паводле Выбарчага кодэксу ўвогуле “не прадугледжваецца абскарджваньне дзеяньняў па фармаваньні ўчастковых выбарчых камісіяў”.

Рашэньне спадарыні Ясіновіч таксама абскарджана ў судзе вышэйшай інстанцыі. Але пакуль скаргі разгледзяць, сфармаваныя ўладамі камісіі ўжо падлічаць галасы. Гары Паганяйла робіць выснову:

“Суды ўхіляюцца ад судовага кантролю над фармаваньнем участковых камісіяў. Гэта жудасная сваволя, і яе немагчыма пераламаць”.

Паводле спадара Паганяйлы, каля 70 працэнтаў участковых камісіяў у Беларусі сфармаваныя з парушэньнем артыкула 35, які забараняе вылучаць у камісію некалькі прадстаўнікоў аднаго калектыву. Ні пракуратура, ні суды, ні ЦВК не рэагуюць на гэтае парушэньне, якое за апошнія гады перарасло ў сыстэму.

“Сфармаваныя такім чынам участковыя камісіі зробяць усё, што трэба цяперашнім уладам. Гэта, па сутнасьці, спосаб незаконнага ўтрыманьня ўлады”, - такую выснову зрабіў вядомы беларускі юрыст Гары Паганяйла.

Старшыня Цэнтарвыбаркаму Лідзія Ярмошына так пракамэнтавала выказваньні спадара Паганяйлы: “Гэта, натуральна, ягонае ўласнае бачаньне закону. Ён можа трактаваць закон нічым не рызыкуючы, як ён хоча”.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG