Лінкі ўнівэрсальнага доступу

“Ва ўладзе адны хамэлеоны”


Агляд тэлефанаваньняў за аўторак, 29 ліпеня.


Аляксандар Лукашэнка прыгразіў прыцягнуць да адказнасьці тых, хто будзе дапускаць страты новага ўраджаю. “Пакуль пару чалавек не пасадзіш — не разумеюць”, — заявіў кіраўнік дзяржавы. Пазьней ён выказаў прапанову не адпускаць зь вёскі адмыслоўцаў, якія скончылі сельскагаспадарчыя ВНУ.

Спадар: “Вось цяпер паказваюць уборку ўраджаю. Трэба за 2 тыдні ўсё прыбраць. Раней людзі прыбіралі ўсе ўраджаі рукамі і зямлі было ў два разы болей. Нашто хваліцца? Зараз тэхніка такая, што ўсё можна прыбраць за тыдзень. Гэта ён хоча на ўвесь сьвет паказаць, які ён”.

У працяг тэмы — СМС-паведамленьне ад Цімы: “Прапаную адправіць Лукашэнку ў калгас назаўсёды. Хай там працуе эканамістам, бо ён вучыўся ў Горацкай сельгасакадэміі. Як кажуць, уласным прыкладам”.

Аўтар наступнага тэлефанаваньня таксама выказвае сваё стаўленьне да кіраўніцтва краіны.

Спадар: “То ён атэіст, то ён вернік. То ён сацыялістычную ўласнасьць не прыватызуе, то адразу ўсё прыватызуе. Учора наш правадыр выказаў спачуваньні ўкраінскаму народу (гэта ў зьвязку з паводкай) і турэцкаму народу (у зьвязку з выбухамі). А да пацярпелых ад выбуху ў Менску так у шпіталі ніхто з высокіх чыноўнікаў і не прыехаў. Хачу сказаць, што ва ўладзе і ў атачэньні — адны хамэлеоны”.

На мінулым тыдні ўрад афрыканскай краіны Зымбабвэ выпусьціў купюру ў 100 мільярдаў зымбабвійскіх даляраў.

Віктар: “У Зымбабвэ — гіпэрынфляцыя, некалькі мільёнаў адсоткаў. У сувязі з гэтым у мяне пытаньне: чаму адна краіна ня можа карыстацца валютай іншай краіны, тымі самымі эўра ці амэрыканскімі далярамі? Які сэнс друкаваць пустыя мільярды? Чаму Беларусь ня можа перайсьці на эўра ў аднабаковым парадку? Усё адно людзі карыстаюцца замежнымі валютамі”.

На пытаньне слухача адказвае эканаміст Аляксандар Чубрык:

“Ёсьць краіны, якія карыстаюцца іншымі валютамі. Таксама ёсьць такі рэжым манэтарнай палітыкі, які называецца валютны камітэт. Гэта калі адна валюта жорстка фіксуецца да другой. Курс нязьменны, і ён гарантаваны велічынёй рэзэрваў. Рэзэрвы ня могуць прадавацца, і нацыянальная валюта ня можа друкавацца, калі зьмяншаюцца суадносіны паміж грашовай масай і рэзэрвамі ў нацыянальнай валюце. Гэта спрыяе зьмяншэньню інфляцыі. Гэтым карыстаюцца. Атрымліваецца, што нацыянальная валюта нібыта і ёсьць, але яна так моцна прывязаная да замежнай валюты, што яе амаль і няма, то бок няма ўласнай манэтарнай палітыкі.

Ці пераходзіць Беларусі на нейкую іншую валюту? Тут ёсьць пэўныя плюсы і пэўныя мінусы. Калі б у нас была вялікая інфляцыя, можна было б пераходзіць на валюту, якой давярае насельніцтва. У 1998-1999 гадах блізу 80% нашай грашовай масы былі ў замежнай валюце. Людзі карысталіся амаль толькі ёй, нацыянальная валюта была выцесьненая. Тады можна было ў якасьці нацыянальнай валюты ўводзіць даляр, і гэтага б ніхто не заўважыў. А цяпер толькі 30% грашовай масы ў валюце. Гэта значыць, што насельніцтва даволі актыўна карыстаецца беларускім рублём. Праз тое, што мы маем валюту, Нацыянальны банк можа праводзіць уласную палітыку, уплываць на эканамічныя працэсы ў краіне”.

Шаноўныя слухачы! Нагадаем: тэлефон “Свабоды” ў Менску — 266-39-52, працуе 24 гадзіны на суткі. Нумар мабільнай сувязі для смс-паведамленьняў: 375.293.912.224. Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода.

Ваша меркаваньне

Паказаць камэнтары

XS
SM
MD
LG