Лінкі ўнівэрсальнага доступу

Сёньня спэцслужбы дапыталі...


Магілёўскіх актывістаў Тацяну Буланаву, Аксану Закрэўскую ды Сяргея Лапуціна сёньня дапытаў сьледчы ўправы Камітэту дзяржаўнай бясьпекі па Магілёўскай вобласьці Юры Жукаў. Ён матываваў допыт неабходнасьцю пацьвердзіць, што ўвечары 3 ліпеня яны бачылі свайго сябра Зьмітра Антончыка ў Магілёве, але насамрэч цікавіўся ня толькі гэтым.

Праваабаронцу Зьмітра Антончыка сьледчы КДБ Юры Жукаў дапытаў яшчэ 21 ліпеня. Сёньня ягоную сяброўкуТацяну Буланаву ён дапытваў ня толькі пра тое, ці бачыла актывістка трэцяга ліпеня ў Магілёве спадара Антончыка. Гаворыць Тацяна Буланава:

Ён выпытваў пра маю вучобу ў Эўрапейскім гуманітарным унівэрсытэце, выглядала гэта нібы так, мімаходзь
“Ён выпытваў пра маю вучобу ў Эўрапейскім гуманітарным унівэрсытэце, выглядала гэта нібы так, мімаходзь. Як у вас адбываецца сэсія, а колькі вам плацяць за сэсію, а як вы кантрольныя здаяце ды дзе вы там жывяце. Я ў яго пытаюся, навошта гэта вам усё. А ён адказвае: “Так проста цікаўлюся ў добрай дзяўчыны”.

Аксану Закрэўскую Юры Жукаў дапытваў па аналягічным сцэнары:

“Ён намагаўся выпытаць: “А чаму вы не працуеце па спэцыяльнасьці ды чаму ня хочаце...” Я яму адказала, што на ні якія пабочныя пытаньні я адказваць наагул ня буду. Я сказала, што магу пацьвердзіць месца знаходжаньня трэцяга ліпеня Зьмітра Антончыка, і на гэтым размовы іншыя былі спыненыя. Наша сустрэча доўжылася ня больш за пятнаццаць хвілінаў”.

Сяргея Лапуціна сьледчы Жукаў дапытваў ва ўправе КДБ. Акрамя пытаньняў, дзе я быў трэцяга й чацьвёртага ліпеня й ці бачыў у Магілёве Зьмітра Антончыка, кажа актывіст, сьледчы цікавіўся ягоным асабістым жыцьцём:

Потым я запытаўся, чаму вас цікавіць маё асабістае жыцьцё, а ён адказаў: “Гэта тычыцца дзяржаўнай бясьпекі, і я не магу адказаць на вашы пытаньні”
“Дзе працуеце, а што завод выпускае, што прадае, сябрам якіх грамадзкіх арганізацыяў вы зьяўляецеся. Пытаўся: “А можа, якія грошы ў грамадзкіх арганізацыях атрымлівалі?” Я яму адказваю: “Якія могуць быць грошы ў грамадзкіх арганізацыях, бо гэта проста грамадзкія арганізацыі”. Потым я запытаўся, чаму вас цікавіць маё асабістае жыцьцё, а ён адказаў: “Гэта тычыцца дзяржаўнай бясьпекі, і я не магу адказаць на вашы пытаньні”.

Усе трое актывістаў лічаць, што пацьверджаньне факту знаходжаньня ў Магілёве Зьмітра Антончыка — толькі нагода для таго, каб дапытаць ужо іх. КДБ, кажуць актывісты, хоча папужаць іх у час выбарчай кампаніі.

На Магілёўшчыне ў справе менскага выбуху ўжо дапытана ўжо дзевяць чалавек. Акрамя згаданых актывістаў міліцыянты з Чэрыкава й Клімавічаў дапытвалі тамтэйшых апазыцыянэраў і журналістаў Сямёна Панізоўцава й Сяргея Аржанцава, пазьней у Магілёве дапыталі намесьніка старшыні Магілёўскай гарадзкой арганізацыі Партыі БНФ Зьмітра Салаўёва, а ў Крычаве -- журналіста Сяргея Няроўнага ды актывіста партыі БНФ Уладзімера Кудраўцава.

Яшчэ на гэтую тэму

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG