Лінкі ўнівэрсальнага доступу

Ці будуць выбары свабоднымі і дэмакратычнымі?


Ці будуць парлямэнцкія выбары свабоднымі і дэмакратычнымі? На гэтае пытаньне адказвалі сёньня гарадзенцы.


Малады спадар: “Пэўна, выбары ня будуць свабоднымі і дэмакратычнымі, бо я ў такое ня веру. Дый увогуле не ўяўляю, каб тут нешта было свабодным”.

Спадар: “А я ведаю, у сваім разуменьні, канечне, што выбары, як мне здаецца, пройдуць адназначна дэмакратычна, таму што іншых папросту ня можа быць. Бо настолькі ўсё адкрыта і празрыста, што ня ведаю нават: ня першы раз гэтыя выбары праходзяць адкрыта і дэмакратычна”.

Іншы спадар: “Як вам сказаць... (Задумваецца.) Ну, я думаю — так”.

Дзяўчына: “Так, я думаю, яны будуць свабоднымі і дэмакратычнымі”.

Карэспандэнт: “А чаму вы так думаеце?”

Дзяўчына: “Таму што прэзыдэнт, думаю, наш так сказаў. Таму будуць” (з усьмешкай).

Карэспандэнт: “Добра, прэзыдэнт так сказаў, а самі вы асабіста што думаеце?”

Дзяўчына: “Я думаю, што ў нас вельмі жорсткі кантроль у Беларусі, і ўсё гэта ад прэзыдэнта залежыць”.

Малады спадар: “Час пакажа, цяпер пакуль што нічога сказаць на гэты конт не магу”.

Ягоная сяброўка: “Я думаю, што ня будуць яны свабоднымі і дэмакратычнымі. Хіба ў нас штосьці свабоднае існуе? Па-мойму, не існуе”.

Дзяўчына: “Ну, абяцалі, што быццам бы мы ўсім пакажам, як у нас усё супэр-пупэр дэмакратычна, як нідзе больш няма. Але калі шчыра, мне ня вельмі верыцца. Хацелася б, канечне, але — не...”

Спадарыня: “Хочацца верыць, што будуць свабоднымі, але думаем...”

Карэспандэнт: “Але думаеце, што — не?”

Спадарыня: “Ну, мы так мяркуем, што наўрад ці”.

Яе сяброўка: “Наўрад ці будуць, па-беларуску кажучы”.

Спадар: “Я ўпэўнены, што выбары будуць недэмакратычнымі і несвабоднымі”.

Карэспандэнт: “Чаму вы так думаеце, што вас пераконвае ў гэтым?”

Спадар: “Адсутнасьць альтэрнатыўных сродкаў масавай інфармацыі. Фактычна яны — адна з умоваў, я лічу, празрыстых і дэмакратычных выбараў. Людзі проста пазбаўленыя альтэрнатыўнай інфармацыі”.

Іншы спадар: “Адназначна не магу сказаць: у нечым будуць, у нечым — не, у нас усё так прыкладна…”

Маладзён: “Я ня ведаю — будуць выбары дэмакратычнымі ці не, але ёсьць мінулы вопыт: на нашым выбарчым участку на мясцовых выбарах заўсёды балятуецца кандыдат ад БНФ і заўсёды набірае паўтара-два працэнты, хоць галасуюць за яго ўсе. Ну пра што тут казаць? Не, бадай, ня будуць яны дэмакратычнымі”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG