Пасьля допыту супрацоўнікі Дэпартамэнту фінансавых расьсьледаваньняў Камітэту дзяржкантроля забралі ў актывіста 1700 даляраў, нібыта “каб праверыць, ці ня ёсьць грошы фальшывымі”, а таксама запатрабавалі прадставіць дэклярацыю аб прыбытках за апошнія 5 гадоў.
Зьміцер Шыманскі патлумачыў ціск на яго жаданьнем ўладаў скампрамэтаваць апазыцыю напярэдадні восеньскіх парлямэнцкіх выбараў. Раней актывіст заяўляў пра намер вылучацца кандыдатам ў дэпутаты парлямэнту.
“Падчас гутаркі са мной ўвесь час працавала відэакамэра. Не выключаю, што гэтыя кадры з’явяцца ў чарговым “пасквілі” пра апазыцыю. Бо даў жа кіраўнік дзяржавы загад разабрацца, “адкуль у іх грошы”, -- мяркуе Зьміцер Шыманскі.
Паводле спадара Шыманскага, ён прыехаў у Менск, каб набыць добры кампутар, неабходны для выпуску друкаваных выданьняў, якія выпускаюць у Берасьці шэраг грамадзкіх арганізацый.
