Судзьдзя Тацяна Рубіс прызнала актывіста вінаватым у зьдзяйсьненьні 14 сакавіка дробнага хуліганства.
14 сакавіка Сяргея Нягаціна а палове на дванаццатую ночы затрымалі каля пад’езда яго дома двое міліцыянтаў патрульна-паставой службы. Нагодай для зьняволеньня сталіся нібыта непрыстойныя паводзіны Нягаціна. Паводле пратаколу затрыманьня, ён быў п’яны й лаяўся матам. Ноч з 14 на 15 сакавіка Сяргей Нягацін прабыў у ізалятары часовага ўтрыманьня.
У судзе Сяргей Нягацін сваёй віны не прызнаў. Ён заявіў, што арышт лічыць палітычна матываваным, а дзеяньні міліцыянтаў незаконнымі.
“Мяне затрымалі каля майго дома. Я быў цьвярозым, у адваротным выпадку міліцыянты б правялі экспэртызу, а так не. Я прызнаю, што абураўся і сам не хацеў ісьці ў службовую машыну. Я таксама прызнаю, што лямантаваў і зваў суседзяў на дапамогу. Міліцыя мне жыцьця не дае, як убачыць адразу ж патрабуе асабістыя рэчы на дагляд”, казаў у судзе актывіст.
Супраць Сяргея Нягаціна сьведчылі двое міліцыянтаў: Пётар Мачэкін ды Сяргей Салабёнак. Яны яго затрымалі.
Паводле міліцыянтаў, Сяргей Нягацін прыцягнуў да сябе ўвагу аб’ёмнай торбай і адсутнасьцю флікера. На патрабаваньне прад’явіць дакумэнты Нягацін адразу ж пачаў мацюкацца.
“Ён выдзер краткі, аб якія выціраюць людзі каля пад’езду ногі, ды кінуў іх у мяне. Я ледзь ухіліўся. Ён таксама зваў суседзяў на дапамогу. У торбе ў яго былі дакумэнты антыдзяржаўнага характару. Я іх адразу ж забраў сабе. Потым апісаў іх у пратаколе”, казаў суду Пётр Мачэкін.
У Сяргея Нягаціна канфіскавалі пяцьдзесят найменьняў рэчаў. Сярод іх былі дзясятак календарыкаў Беларускай службы “Радыё Свабоды”, некалькі асобнікаў недзяржаўнай газэты “Магілёўскі час”, а таксама блянк рэкамэндацыі у камітэт рэпрэсаваных.
Міліцыянты паведамілі таксама суду, што Сяргей Нягацін пагражаў ім, што пасьля 25 сакавіка ўсім міліцыянтам будзе кепска.
Судзьдзя Тацяна Рубіс палічыла тлумачэньні міліцыянтаў праўдападобнымі, а тлумачэньні Сяргея Нягаціна формай самаабароны й пакарала яго трыма базавымі велічынямі.
