Пра гэта паведаміла сястра Вольгі Алена. “Дамоў яны не вярнуліся. Мабільныя тэлефоны таксама не адказваюць”, — паведаміла жанчына пасьля таго, як Раман і Вольга пабывалі ў Маскве на здымках перадачы “Пусть говорят”, адкуль яны меліся вярнуцца пазаўчора.
Між тым міліцыя завяла на Рамана Менцюка крымінальную справу за кіраваньне аўтамабілем у нецьвярозым стане і без правоў. Адказнасьць пагражае і Вользе Мянцюк — за тое, што перадала руль аўтамабіля нецьвярозаму. Ці шукае міліцыя Рамана Менцюка і ягоную жонку Вольгу? З гэтым пытаньнем “Радыё Свабода” зьвярнулася да кіраўніка прэсавай службы Менскай абласной міліцыі Аляксандра Шункевіча. Вось што адказаў міліцыянт.
Аляксандар Шункевіч: “На гэты час сьледзтва ня мае патрэбы ў іх, і таму пракамэнтаваць, дзе яны, ніхто ня можа”.
Карэспандэнт: “Дык іх шукаюць ці не?”
Шункевіч: “А навошта, калі ў іх няма патрэбы?”
Карэспандэнт: “Але ёсьць зьвесткі, што іх няма ў краіне…”
Шункевіч: “І што?”
Карэспандэнт: “Вас гэта не цікавіць?”
Шункевіч: “Не, я цікавіўся. Мне сказалі, што ў іх зараз няма патрэбы, сьледзтва працуе зь іншымі сьведкамі. А правядзеньне сьледчага экспэрымэнту адкладаецца ў сувязі з надвор’ем”.
Карэспандэнт: “Вось пра гэтыя экспэрымэнты. Было вядома, што яны вельмі патрэбныя”.
Шункевіч: “Так, але надвор’е павінна быць такое самае, як было”.
Карэспандэнт: “А калі яны ня зьявяцца ў хуткім часе, ці магчыма завядзеньне крымінальнай справы па іх пошуку?”
Шункевіч: “Не”.