Лінкі ўнівэрсальнага доступу

Спроба сабрацца на плошчы скончылася затрыманьнямі


На пачатку акцыі прадпрымальнікаў міліцыянты затрымалі Аляксандра Мілінкевіча, лідэра руху “За свабоду”. Пасьля гэтага было затрымана яшчэ некалькі чалавек, якія намагаліся трапіць на Кастрычніцкую плошчу, каб удзельнічаць у мітынгу прадпрымальнікаў.


За некалькі хвілінаў да заплянаванага пачатку акцыі прадпрымальнікаў міліцыянты схапілі лідэра руху “За свабоду” Аляксандра Мілінкевіча на плошчы Перамогі. Разам зь ім затрымалі Аляксея Кавальца і Алеся Лагвінца.

Усіх адвезьлі ў сьледчы камітэт, што на вуліцы Сапёраў, і дапыталі ў крымінальнай справе, якую раней распачалі ў сувязі з падзеямі 10 студзеня.

Нагадаем: 10 студзеня больш за дзьве тысячы ўдзельнікаў акцыі пратэсту прадпрымальнікаў перакрылі праспэкт Незалежнасьці і калёнай прайшлі па праезнай частцы праспэкту да Дому Ўраду.

Міністар унутраных справаў Уладзімер Навумаў назваў гэта масавымі беспарадкамі і паведаміў, што міліцыя распачала крымінальную справу.

Аляксандар Мілінкевіч паведаміў “Свабодзе” пасьля допыту:

“Больш за тры гадзіны сьледчы дапытваўся аб тым, які я ўдзел прымаў, чаму прымаў, хто быў арганізатарам, каго я ведаю і г.д. Ён патлумачыў, што распачата крымінальная справа. Праўда, ён не сказаў, хто абвінавачаны. Я праходзіў як сьведка”.

Міліцыянты таксама затрымалі Вячаслава Сіўчыка і аднаго зь лідэраў прадпрымальніцкага руху Аляксандра Макаева. Спачатку іх амаль тры гадзіны трымалі ў міліцыі Ленінскага раёну, а потым адвезьлі ў сьледчы камітэт, каб дапытаць у крымінальнай справе.

На Кастрычніцкай плошчы было амаль усё міліцэйскае кіраўніцтва – афіцэры зь міністэрства і з гарадзкога ўпраўленьня ўнутраных справаў. Як толькі на плошчы зьбіралася група зь дзясятак чалавек, яе абкружалі спэцназаўцы і выціскалі людзей з плошчы ў розныя бакі.

Прадпрымальнікі абураліся:

Генадзь: “Мы абураныя. Тое, што нас выштурхнулі з Кастрычніцкай плошчы, выклікае хвалю абурэньня. АМОН паступіў подла, ня даўшы прадпрымальнікам выказаць сваю пазыцыю ў сувязі з 760 указам. Я б параўнаў – як Сталін зьнішчыў НЭП, так Лукашэнка ў 2008 годзе зьнішчае сярэдні кляс”.

Сяргей: “Прадпрымальнікам не далі слова. Улады хаця б задумаліся, што яны робяць!”

Нас, дробных рыбак, хочуць скарміць вялікім акулам. Чаму ў гіпэрмаркеце цэны вышэйшыя за мае, ІП?
Канстанцін
: “У такой краіне жывём. Штурхаюць... Ну, у іх загад”.

Прадпрымальніца Алена з Баранавічаў:

“Мы ня бачым тут інтарэсаў дзяржавы. Тут інтарэсы буйнога бізнэсу. Нас, дробных рыбак, хочуць скарміць вялікім акулам. Чаму ў гіпэрмаркеце цэны вышэйшыя за мае, ІП? Я таксама заплаціла падатак. Плачу падаткі наперад, а сплю неспакойна. Пры гэтым мяне называюць спэкулянткай”.

Для ўдзелу ў трэцяй акцыі прадпрымальнікаў прыехалі людзі з рэгіёнаў. Міхаіл з Наваполацку апавёў:

“Нас папросту зьнішчаюць як кляс. Мы зь Віцебскай вобласьці. У рэгіёнах такія рэпрэсіі ідуць!.. У Менску, можа, яшчэ нешта працуе, а ў рэгіёнах не працуюць ні фабрыкі, ні заводы. Людзі ня могуць цяпер працаўладкавацца. Вось у мяне, напрыклад, працавалі тры жанчыны. Яны цяпер ня могуць знайсьці сабе працу”.

На плошчы міліцыянты затрымалі прадпрымальніка з Гомеля Ўладзімера Няпомняшчых разам з жанчынай, прозьвішча якой невядомае. Іх пасадзілі ў міліцэйскі “варанок” і адвезьлі ў Цэнтральны РУУС.

Нас папросту зьнішчаюць як кляс...
Спэцназаўцы некалькі разоў выціскалі людзей жывымі ланцугамі з Кастрычніцкай плошчы — па праспэкце Незалежнасьці ў бок ГУМу і па вуліцы Энгельса на плошчу Свабоды. Мінакоў не прапускалі. Менавіта такім чынам менчукі даведваліся, што на плошчы заплянаваны мітынг прадпрымальнікаў. У бок уладаў многія людзі выказваліся даволі нэгатыўна.

Падчас разгону патэнцыйных удзельнікаў акцыі спэцназаўцы затрымалі Вольгу Казуліну, якая спрабавала прайсьці з расьцяжкай. Дзяўчыну адвезьлі ў міліцыю Цэнтральнага раёну.

Міліцыянты паведамілі, што пасьля высьвятленьня асобаў усіх затрыманых вызваляць.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG