«Ланцуг салідарнасьці» з затрыманымі ў Менску
Магілёў. На пікет салідарнасьці насупраць гарвыканкаму прыйшлі каля 100 чалавек. За пікетоўцамі назіралі людзі ў цывільным. Неўзабаве пасьля пачатку пікету ўдзельнікі перайшлі на Першамайскую вуліцу і выстраіліся ўздоўж яе. Міліцыя папярэджвала пра адказнасьць і пагражала ўжыць сілу.
Людзі кажуць, што выйшлі, бо надакучыла трываць, бо хочуць падтрымаць затрыманых. Яны кажуць, што баяцца, але іншага шляху, як адкрыта пратэставаць, ня бачаць.
Людзі ў розных гарадаў выходзяць у «ланцугі салідарнасьці»
Тым часам у розных гарадах Блеарусі людзі выйшлі на вуліцы ў падтрымку зьняволеных падчас сёлетняй выбарчай кампаніі: патэнцыйнага кандыдата ў прэзыдэнты Віктара Бабарыкі, блогера Сяргея Ціханоўскага і іншых палітыкаў і актывістаў. Тэлеграм-канал Nexta публікуе фота і відэа ад чытачоў з розных гарадоў Беларусі.
«Ланцуг салідарнасьці» ў Стоўпцах:
Орша:
Бабруйск:
Ліда:
Баранавічы:
Гомель:
У Менску, Гомлі і іншых гарадах Беларусі паведамляюць пра перабоі з мабільным інтэрнэтам
У прыватнасьці, пра праблемы з мабільным інтэрнэтам ад A1 паведамлялі з Гомля, Магілёва, Ліды і Менску.
Свабоа плянавала весьці онлайн-трансьляцыю зь са збору подпісаў у Менску, але адсутнасьць інтэрнэту ў цэнтры Менску не дазволіла нам весьці стрым. Але мы працуем на месцы і будзем выкладаць рэпартажы зь месца падзеяў.
У КДБ і ЦВК не прынялі 31 тысячу подпісаў за вылучэньне Бабарыкі ў прэзыдэнты. ФОТА
Сябры ініцыятыўнай групы Віктара Бабарыкі спрабавалі перадаць у Камітэт дзяржаўнай бясьпекі 31 тысячу подпісаў за вылучэньне Бабарыкі ў прэзыдэнты. Паколькі Віктар і Эдуард учора былі затрыманыя, цяпер ніхто ня можа падаць частку подпісаў у раённыя выбарчыя камісіі. Але ў прыёмнай КДБ сябрам ініцыятыўнай групы адмовілі, патлумачыўшы, што гэта не кампэтэнцыя органаў дзяржаўнай бясьпекі.
Пазьней усе гэтыя подпісы адвезьлі ў ЦВК. Там подпісы таксама не прынялі. Цалкам чытайце па спасылцы.
«Псіхо3%». На краму Symbal.by наступ міліцыі, падатковай, АБЭП
«Акрамя раней забраных 419 маек „Псіхо3%“, нас прымусілі спыніць вытворчасьць, забралі з цэху 9 бел-чырвона-белых сьцягоў і ўжо два дні як у краме зьнікла сьвятло», — паведаміў дырэктар крамы Symbal.by Павал Белавус. Павал Белавус лічыць, што ўсё гэта «наўпрост зьвязана з выбарчай кампаніяй у Беларусі».
Надпіс ПСІХОЗ% на майцы symbal.by зьвязаны зь лічбай 3 %. Менавіта столькі ў розных інтэрнэт-апытаньнях атрымлівае Аляксандар Лукашэнка, што стала ўжо папулярным інтэрнэт-мэмам. Што адбываецца цяпер з крамай і вытворчасьцю Symbal.by, чытайце ў вялікім інтэрвію зь Белавусам па спасылцы.
Telegram-канал і чаты Ціханоўскага ўзламалі, разьмясьцілі сымболіку БРСМ
Днём 19 чэрвеня Telegram-канал «Страна для жизни», а затым і чат каналу, быў узламаны невядомымі. Канал і чат былі прысьвечаныя зьняволенаму блогеру Сяргею Ціханоўскаму і патэнцыйнай кандыдатцы ў прэзыдэнты Сьвятлане Ціханоўскай. Цяпер жа на іх разьмешчаная сымболіка кампаніі БРСМ «#раЗАм».
Ці зьвязаны ўзлом з праўладным Беларускім рэспубліканскім саюзам моладзі, невядома. У гэтай арганізацыі Свабодзе паабяцалі разабрацца і адказаць пазьней, «на гэты момант такой інфармацыі няма». Цалкам чытайце па спасылцы.
«Вы ж таксама таты, мамы, браты і сёстры». Дачка затрыманага Віктара Бабарыкі зьвярнулася да праваахоўнікаў
19 чэрвеня дачка Віктара Бабарыкі Марыя пракамэнтавала ў Фэйсбуку затрыманьне 18 чэрвеня ў Менску свайго бацькі і брата, кіраўніка выбарчага штабу патэнцыйнага кандыдата ў прэзыдэнты Эдуарда.
«Маё сэрца з тымі, хто пацярпеў ад дзеяньняў, якія ў корані парушаюць Канстытуцыю Рэспублікі Беларусь і правы чалавека, — піша Марыя, адзначаючы, што яна цяпер «не адзіная дачка і сястра, суткамі якая сядзіць ля тэлефона ў чаканьні навінаў», і зьвяртаецца да супрацоўнікаў праваахоўных органаў Беларусі: — Вы ж таксама таты, мамы, браты і сёстры — калі ласка, памятайце пра гэта і пра тое, што вы — абаронцы закона». Цалкам чытайце па спасылцы.
Праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы
Беларускія праваабарончыя арганізацыі выступілі з супольнай заявай, у якой запатрабавалі ад уладаў спыніць рэпрэсіі. Віктар і Эдуард Бабарыкі, Сьвятлана Купрэева і Ўладзімер Дудараў былі прызнаныя імі палітычнымі зьняволенымі.
Прадстаўнікі беларускіх праваабрончых арганізацыяй патрабуюць:
- неадкладнага вызваленьня В. Бабарыкі, Э. Бабарыкі, С. Купрэевай і У. Дударава з-пад варты,
- забяспячэньня В. Бабарыку магчымасьці бесперашкоднага ўдзелу ў свабодных і дэмакратычных выбарах,
- адмовы ад выкарыстаньня мэтадаў крымінальнага перасьледу як інструмэнту ціску на ўдзельнікаў кампаніі,
- неадкладнага спыненьня рэпрэсій у дачыненні да грамадзянаў і непасрэдных удзельнікаў выбарчага працэса, а таксама вызвалення ўсіх палітычных зьняволеных.
«Гэта выглядае як зьвёны аднаго ланцуга»,— Цапкала пра затрыманьні Ціханоўскага і Бабарыкі
Прэтэндэнт на пасаду прэзыдэнта Беларусі Валер Цапкала ў інтэрвію расейскаму агенцтву «РИА Новости» асудзіў затрыманьне свайго канкурэнта на выбарах Віктара Бабарыкі, і заклікаў беларускія ўлады да «сумленнай гульні».
На пытаньне, ці можна разглядаць як пасьлядоўныя зьвёны аднаго ланцуга затрыманьні блогера Сяргея Ціханоўскага і Віктара Бабарыкі, Цапкала сказаў, што «прынамсі, гэта выглядае так». «Падобна на тое, у вачах большай часткі насельніцтва Беларусі гэта выглядае як зьвёны аднаго ланцуга», — сказаў Цапкала. Цалкам чытайце па спасылцы.
Кіраўнік замежнай палітыкі Эўразьвязу заклікаў Менск вызваліць Бабарыку
Жузэп Барэль, высокі прадстаўнік ЭЗ у замежных справах і палітыцы бясьпекі, заклікаў беларускія ўлады забясьпечыць рэальныя канкурэнтныя ўмовы ў перадвыбарнай кампаніі.
«Палітычна матываваныя абмежавальныя захады не павінны перашкаджаць ніводнаму патэнцыйнаму кандыдату ў выкананьні працэдуры рэгістрацыі», — напісаў у заяве Пэтэр Стана, прэсавы прадстаўнік Жузэпа Барэля.
«Учора Віктар Бабарыка, адзін з патэнцыйных кандыдатаў у прэзыдэнты, і яго сын Эдуард Бабарыка, кіраўнік кампаніі, былі затрыманыя па крымінальнай справе. ЭЗ заклікае беларускія ўлады неадкладна вызваліць іх ад утрыманьня пад вартай і гарантаваць поўнае захаваньне вяршэнства закону, уключаючы сумленнае і празрыстае расьсьледаваньне і права на доступ да адваката», — гаворыцца ў заяве.
«Самой цікава, ці можа незалежны сябар камісіі на нешта ўплываць». Як беларусы спрабуюць трапіць у выбарчыя камісіі
Кожны паўналетні грамадзянін Беларусі можа стаць сябрам участковай выбарчай камісіі. Ініцыятыва «Сумленныя людзі» тлумачыць, як гэта зрабіць законна і хутка. Цяпер такіх ахвочых некалькіх сотняў.
Свабода сабрала некалькі гісторыяў людзей, які хочуць трапіць у склад участковых выбарчых камісіяў. Чытайце артыкул па спасылцы.
«Называць замежныя апэрацыі вывадам грошай — абсурд». Што ня так з абвінавачаньнямі Бабарыку, якія паказалі ў тэлевізіі
У сюжэце дзяржаўнай тэлевізіі паказалі дакумэнты, якія нібыта сьведчаць пра вывад Віктарам Бабарыкам грошай за мяжу і даказваюць ягоную датычнасьць да супрацьпраўнай дзейнасьці.
Свабода ўважліва паглядзела гэтыя сюжэты і паспрабавала разабрацца, пра што можа сьведчыць тое, што ў іх паказалі. Чытайце артыкул па спасылцы.
Крэмль папрасіў Менск аргумэнтаваць словы пра «лялькаводаў» з «Газпрому»
Прэс-сакратар прэзыдэнта Расеі Дзьмітрый Пяскоў сказаў журналістам 19 чэрвеня, што Менск павінен аргумэнтаваць свае абвінавачаньні, нібыта да цяперашніх падзеяў у Беларусі датычныя «лялькаводы» з «Газпрому».
«Падобныя абвінавачаньні на адрас міжнародных кампаній ня могуць быць галаслоўнымі, павінны падмацоўвацца аргумэнтамі», — заявіў Пяскоў.
Прэс-сакратар прэзыдэнта Расеі таксама падкрэсьліў, што інтарэсы найбуйнейшых кампаній краіны «заўсёды знаходзяцца пад абаронай расейскай дзяржавы».
«Гэта адзін з прыярытэтаў — абарона нашых кампаній, якія працуюць у іншых краінах, у тым ліку і Беларусі», — адзачыў Пяскоў. «Пакуль у мяне няма ніякіх дадатковых камэнтароў на гэты конт», — дадаў ён.
Кіраўнік Інстытуту сацыялёгіі пацьвердзіў, што ў сакавіку рэйтынг даверу да Лукашэнкі быў 24%, а да ЦВК — 11%
Кіраўнік Інстытуту сацыялёгіі Акадэміі навук Беларусі Генадзь Коршунаў пацьвердзіў, што ў сакавіку-пачатку красавіка 2020 года паводле дасьледаваньня інстытуту рэйтынг даверу да Лукашэнкі ў Менску быў 24%, а да ЦВК — 11%.
На пытаньне, ці зьмяніліся гэтыя лічбы цяпер, Коршунаў адказаў, што цяпер інстытут «толькі спрабуе пачаць новае даследаваньне», бо не хацелася б рызыкаваць здароўем рэспандэнтаў у сувязі з эпідэміяй каранавірусу, «прынялі рашэньне пачакаць».
Лукашэнка: «Ня трэба з зладзюгаў, буржуяў і махляроў, якія сядзяць у „Белгазпрамбанку“, рабіць герояў»
Аляксандар Лукашэнка заявіў, што ўважліва назірае за сытуацыяй, якая складваецца ў краіне. І перакананы, што пэўныя палітычныя сілы спрабуюць выкарыстаць людзей.
«Я пакуль прашу і папярэджваю перш за ўсё гэтых людзей: не прымушайце ўлады ісьці на нейкія захады рэагаваньня, не падштурхоўвайце нас да гэтага», — папярэдзіў ён, зьвярнуўшыся перадусім да бацькоў маладых людзей.
«Выкарыстоўваюць пацаноў, якія ня маюць да выбараў ніякага дачыненьня — па 15-17 гадоў. Яны ня памятаюць Беларусь, зь якой мы выходзілі з вамі ў лапцях і без штаноў у сярэдзіне 1990-х. Ня памятаюць тых талёнаў, што не маглі купіць бутэльку малака. Ня памятаюць, што на трое сутак у Менску мукі хапала, каб сьпекчы хлеб. Жывуць у чыстай і сьветлай Беларусі і думаюць, што ўсё гэта ўпадзе ім зь неба. Зразумела, гэта і наша недапрацоўка, што не патлумачылі».
Вядоўца ўкраінскага тэлеканалу пра падзеі ў Менску: «Гэта сьмерць чырвонай імпэрыі. Жыве Беларусь!»
«Арышты і перасьлед — традыцыйныя дробязі выбарчай кампаніі». Што ўкраінскія СМІ пішуць пра выбарчыя падзеі і рэпрэсіі ў Беларусі.
Ва Ўкраіне ўсе найбуйнейшыя сродкі масавай інфармацыі паведамляюць пра арышт Віктара Бабарыкі і ягонага сына Эдуарда, а таксама пра акцыю салідарнасьці з усімі затрыманымі цягам выбарчай кампаніі, якая доўжылася ў Менску больш за 6 гадзін. Былога кіраўніка «Белгазпрамбанку» ўкраінскія экспэрты і журналісты называюць галоўным канкурэнтам Аляксандра Лукашэнкі.
Пасольства ЗША падтрымала права беларусаў на «мірны ўдзел у прэзыдэнцкіх выбарах, не асьцерагаючыся запалохваньня»
«Злучаныя Штаты падтрымліваюць права ўсіх беларусаў на мірны ўдзел у прэзыдэнцкіх выбарах, не асьцерагаючыся запалохваньня. Павага асноўных свабодfo і дэмакратыі ўмацоўвае сувэрэнітэт і незалежнасьць Беларусі і пракладае шлях да больш цесных сувязяў з ЗША». — гаворыцца ў Твітэры амэрыканскага прадстаўніцтва.
18 чэрвеня ў цэнтры Менску, каля Беларускай дзяржаўнай філярмоніі на праспэкце Незалежнасьці прайшоў супольны пікет прадстаўнікоў апазыцыйнай правацэнтрысцкай кааліцыі.
Ці пачалося ў Беларусі «паўстаньне масаў»? Піша Валер Карбалевіч
Менск адрэагаваў на рэпрэсіі супраць апанэнтаў рэжыму 7-гадзіннай акцыяй салідарнасьці. Прэзыдэнцкая кампанія разьняволіла грамадзтва, спарадзіла надзею на перамены, дух свабоды. І загнаць гэтыя настроі назад у прыгнечаны стан рэжыму будзе цяжка.
Сьцісла:
- Кампанія публічнай дыскрэдытацыі Віктара Бабарыкі не працуе, а, магчыма, дае нават адваротны эфэкт.
- Арыштам Бабарыкі Лукашэнка ня зьняў праблему, на што, здаецца, разьлічваў. Назапашаная ў грамадзтве энэргія пратэсту можа стрэліць самым нечаканым чынам.
- Канфлікт паміж уладай і апазыцыяй трансфармаваўся ў канфлікт паміж уладай і народам.
- Голас той часткі насельніцтва, якая выступае супраць існага рэжыму, гучыць моцна, яго чуваць, гэтых людзей добра відаць. А вось прыхільнікаў Лукашэнкі фактычна няма на інфармацыйным экране. У асноўным ад імя гэтых людзей гаворыць выключна ўлада.
- Пакуль пратэставыя настроі грамадзтва, «паўстаньне масаў» ніяк не канвэртуецца ў «крызіс вярхоў», не вядзе да расколу элітаў (прынамсі, вонкава).
Упершыню пасьля затрыманьня Бабарыкі да яго ў СІЗА КДБ запрасілі адваката
Адвакат затрыманага прэтэндэнта на пасаду прэзыдэнта Беларусі Віктара Бабарыкі запрошаны ў сьледчы ізалятар КДБ для ўдзелу ў працэсуальных дзеяньнях.
«Мне затэлефанавалі з КДБ і запрасілі для ўдзелу ў працэсуальных дзеяньнях у дачыненьні да Віктара Бабарыкі. Спадзяюся, што атрымаецца сустрэцца з маім падабаронным», — паведаміў адвакат Зьміцер Лаеўскі.