МЗС Беларусі лічыць, што адкліканьне прадстаўніка Ўкраіны з выканкаму СНД носіць выключна тэхнічны характар. Яно ня мае пад сабой палітычнай падаплёкі.
Пра гэта заявіў сёньня прэсавы сакратар МЗС Беларусі Дзьмітры Мірончык:
«Паводле той інфармацыі, якую мы маем, мы лічым, што гэта тэхнічнае рашэньне».
Прэзыдэнт Украіны Пятро Парашэнка вырашыў адклікаць Анатоля Дроня з выканкаму СНД у сувязі з заявай дыплямата. Адпаведны ўказ падпісаны ў Кіеве 12 лістапада.
Анатоль Дронь быў камандзіраваны у выканкам СНД для выкананьня абавязкаў намесьніка старшыні выканкаму СНД «па ўкраінскай квоце».
Новае кіраўніцтва Ўкраіны некалькі разоў заяўляла пра жаданьне краіны выйсьці з СНД. Аднак паводле статуту Садружнасьці гэтая працэдура ня можа адбыцца раней аднаго каляндарнага году з моманту падачы адпаведнай заявы. Менавіта столькі павінна была чакаць Грузія, перш чым яна пакінула СНД.
