Аляксандар Лукашэнка 15 сьнежня зрабіў кадравыя прызначэньні.
Як паведамляе ягоная прэс-служба, міністрам адукацыі прызначаны Ігар Карпенка, раней ён быў намесьнікам старшыні Менгарвыканкаму. Ігар Карпенка — лідэр праўладнай Камуністычнай партыі Беларусі.
Міністрам працы і сацыяльнай абароны прызначаны Валеры Малашка. Раней гэтую пасаду займала Марʼяна Шчоткіна, але яна была абраная ў Савет Рэспублікі і таму мусіла пакінуць пасаду міністра.
Былая намесьніца міністра замежных спраў Алена Купчына прызначаная амбасадарам Беларусі ў Аўстрыі.
Галоўны рэдактар газэты і кіраўнік выдавецкага дома «Звязда» Аляксандар Карлюкевіч прызначаны намесьнікам міністра інфармацыі. Яго месца заняў былы рэдактар «Гродзенскай праўды» Павал Сухарукаў.