Алег Супрунюк, Берасьцейская вобласьць На Берасьцейшчыне адбыліся ўрачыстасьці з нагоды 259-х угодкаў з дня нараджэньня Тадэвуша Касьцюшкі – нацыянальнага героя Беларусі, ЗША і Польшчы, ганаровага грамадзяніна Францыі, вядомага палітычнага і вайсковага дзеяча Рэчы Паспалітай.
Штогод 4 лютага на радзіму Тадэвуша Касьцюшкі, у былы фальварак Мерачоўшчына каля Косава, прыяжджаюць прадстаўнікі дыпляматычных місіяў, акрэдытаваных у Беларусі, супрацоўнікі мясцовых органаў улады і звычайныя грамадзяне.
Сёлетнія ўрачыстасьці адбываліся ўпершыню пасьля таго, як восеньню мінулага году была адноўленая сядзіба сям’і Касьцюшкаў. За апошнія два гады, акрамя грошай з абласнога бюджэту, на аднаўленьні сядзібы былі выкарыстаныя і сродкі замежных дзяржаваў. Больш за 28 тысячаў даляраў на гэтыя мэты ахвяравала амбасада Злучаных Штатаў Амэрыкі ў Беларусі.
Плянуецца, што ў сядзібе будзе разьмешчаны музэй Тадэвуша Касьцюшкі, але пакуль для адкрыцьця паўнавартаснай экспазыцыі не хапае гістарычных дакумэнтаў ды іншых рэчаў, якія б нагадвалі пра жыцьцёвы лёс ураджэнца берасьцейскай зямлі.
У часе свайго выступу амбасадар ЗША Джордж Крол зазначыў, што ідэалы свабоды, якія абараняў Касьцюшка, сугучныя з тымі ідэаламі, за якія сёньня аддаюць свае жыцьці амэрыканскія жаўнеры, выконваючы вайсковы абавязак за межамі сваёй краіны.
Як і летась прамова спадара Крола прагучала па-беларуску, а вось жыхары Івацэвіцкага раёну сёньня ўпершыню пачулі выступ на роднай мове старшыні мясцовага райвыканкаму Віталя Дзьмітраніцы.
Урачыстыя мерапрыемствы з нагоды дня нараджэньня Тадэвуша Касьцюшкі ладзіліся ня толькі ў мясьцінах, дзе ён зьявіўся на сьвет. Памяць пра славутага змагара за свабоду была ўшанаваная 4 лютага і ў Жабінкоўскім раёне. Тут, у вёсцы Малыя Сяхновічы, якая ў XVII стагоддзі была родавай сядзібай Касьцюшкаў, знаходзіцца адзіны ў Беларусі помнік нашаму земляку, а ў мясцовай школе адчынены музэйны пакой. У вёсцы Чыжэўшчына ўдзельнікі імпрэзаў наведалі мэмарыяльную капліцу, пабудаваную ў гонар удзельнікаў нацыянальна-вызвольнага паўстаньня 1794 году, якім кіраваў Тадэвуш Касьцюшка. Капліца таксама зьявілася толькі летась, у той час як памяць пра Аляксандра Суворава, чые войскі задушылі паўстаньне, захаваная ў назвах установаў і вуліцаў многіх беларускіх гарадоў.
фота © К. Шастоўскі (radzima.org). Мэмарыяльны крыж на месцы былой сядзібы Касьцюшкаў, 2003. Cядзіба спаленая савецкімі партызанамі падчас Другой сусьветнай вайны
Сёлетнія ўрачыстасьці адбываліся ўпершыню пасьля таго, як восеньню мінулага году была адноўленая сядзіба сям’і Касьцюшкаў. За апошнія два гады, акрамя грошай з абласнога бюджэту, на аднаўленьні сядзібы былі выкарыстаныя і сродкі замежных дзяржаваў. Больш за 28 тысячаў даляраў на гэтыя мэты ахвяравала амбасада Злучаных Штатаў Амэрыкі ў Беларусі.
Плянуецца, што ў сядзібе будзе разьмешчаны музэй Тадэвуша Касьцюшкі, але пакуль для адкрыцьця паўнавартаснай экспазыцыі не хапае гістарычных дакумэнтаў ды іншых рэчаў, якія б нагадвалі пра жыцьцёвы лёс ураджэнца берасьцейскай зямлі.
У часе свайго выступу амбасадар ЗША Джордж Крол зазначыў, што ідэалы свабоды, якія абараняў Касьцюшка, сугучныя з тымі ідэаламі, за якія сёньня аддаюць свае жыцьці амэрыканскія жаўнеры, выконваючы вайсковы абавязак за межамі сваёй краіны.
Як і летась прамова спадара Крола прагучала па-беларуску, а вось жыхары Івацэвіцкага раёну сёньня ўпершыню пачулі выступ на роднай мове старшыні мясцовага райвыканкаму Віталя Дзьмітраніцы.
Урачыстыя мерапрыемствы з нагоды дня нараджэньня Тадэвуша Касьцюшкі ладзіліся ня толькі ў мясьцінах, дзе ён зьявіўся на сьвет. Памяць пра славутага змагара за свабоду была ўшанаваная 4 лютага і ў Жабінкоўскім раёне. Тут, у вёсцы Малыя Сяхновічы, якая ў XVII стагоддзі была родавай сядзібай Касьцюшкаў, знаходзіцца адзіны ў Беларусі помнік нашаму земляку, а ў мясцовай школе адчынены музэйны пакой. У вёсцы Чыжэўшчына ўдзельнікі імпрэзаў наведалі мэмарыяльную капліцу, пабудаваную ў гонар удзельнікаў нацыянальна-вызвольнага паўстаньня 1794 году, якім кіраваў Тадэвуш Касьцюшка. Капліца таксама зьявілася толькі летась, у той час як памяць пра Аляксандра Суворава, чые войскі задушылі паўстаньне, захаваная ў назвах установаў і вуліцаў многіх беларускіх гарадоў.
фота © К. Шастоўскі (radzima.org). Мэмарыяльны крыж на месцы былой сядзібы Касьцюшкаў, 2003. Cядзіба спаленая савецкімі партызанамі падчас Другой сусьветнай вайны