«Мы вызначылі, што для зьменаў неабходнае абнаўленьне Кабінэту міністраў. Я ўдзячны Юліі за выразную, стабільную і эфэктыўную працу на пасадзе прэм’ер-міністра і прапанаваў ёй узначаліць новы значны напрамак у адносінах з ключавым партнэрам», — напісаў Зяленскі.
Ён не ўдакладніў, хто стане новым кіраўніком ураду. Паводле ўкраінскіх СМІ, сярод магчымых кандыдатаў называюць кіраўніка «Нафтагазу» і «Укрнафты» Сяргея Карэцкага, міністра абароны Міхаіла Фёдарава, міністра энэргетыкі Германа Галушчанку і мэра Харкава Ігара Церахава.
Зяленскі заявіў, што Ўкраіна мяняе палітычную стратэгію. Ён таксама анансаваў зьмены ў кіраўніцтве праваахоўных органаў і прызначэньне асобаў, адказных за ключавыя зьнешнепалітычныя напрамкі — адносіны з ЗША, Эўразьвязам, суседнімі краінамі, Блізкім Усходам і Кітаем.
Юлія Сьвірідэнка ўзначаліла ўрад Украіны ў ліпені 2025 году, зьмяніўшы на гэтай пасадзе Дзяніса Шмыгаля, які быў прэм’ерам амаль пяць гадоў.
Як адрэагавала Юлія Сьвірыдэнка
Прэм’ер-міністарка Ўкраіны Юлія Сьвірідэнка пацьвердзіла, што яе ўрад рыхтуецца пакінуць свае пасады.
Пасьля сустрэчы з прэзыдэнтам Украіны Ўладзімірам Зяленскім 12 ліпеня яна напісала ў Facebook, што абмеркавала з кіраўніком дзяржавы «далейшыя крокі».
Сьвірідэнка падзякавала ўраду за працу ў час вайны, адзначыўшы, што каманда прымала складаныя рашэньні, падтрымлівала эканоміку і працавала ў прыфрантавых рэгіёнах.
«Гатовая і надалей служыць украінскай дзяржаве і выконваць заданьні, накіраваныя на ўзмацненьне пазыцый Украіны, абарону нацыянальных інтарэсаў і набліжэньне справядлівага міру», — заявіла яна.