Мясцовае выданне BluRadio паведаміла, што на борце знаходзілася 114 жаўнераў і 11 сяброў экіпажу.
Міністар абароны Калюмбіі Пэдра Санчэс заявіў, што аварыя адбылася, калі самалёт узьлятаў з Пуэрта-Легуісама, разьмешчанага ў глыбіні паўднёвай Амазоніі ў Калюмбіі на мяжы з Пэру, паведамляе Reuters.
«Дакладная колькасьць ахвяр і прычыны катастрофы пакуль не вядомыя», — сказаў ён.
BluRadio са спасылкай на ўлады паведаміла, што на борце былі 110 жаўнераў, а катастрофа адбылася ўсяго за 3 км ад цэнтру гораду. Амэрыканская абаронная кампанія Lockheed Martin не адразу адказала на просьбу аб камэнтары.
Пазьней крыніца паведаміла, што ў самалёце было больш асобаў, чым сьпярша заяўлялася. Першыя вынікі ратаўнічай апэрацыі паказалі, што больш за 60 чалавек з траўмамі, у тым ліку цяжкімі, даставілі ў шпіталі. Апэрацыя працягваецца.
Здымак зь месца авіякатастрофы
Самалёты Hercules C-130 былі ўпершыню выпушчаныя ў 1950-х гадах, а першыя мадэлі Калюмбія набыла ў канцы 1960-х гадоў.
Нядаўна кампанія мадэрнізавала некаторыя старыя C-130 на новыя мадэлі, адпраўленыя з ЗША ў адпаведнасьці з законам, які дазваляе перадаваць выкарыстаную або лішнюю вайсковую тэхніку.
У канцы лютага яшчэ адзін Hercules C-130, які належыць балівійскім ВПС, разьбіўся ў густанаселеным горадзе Эль-Альта, ледзь не зачапіўшы жылыя дамы. Больш за 20 чалавек загінулі і яшчэ 30 атрымалі раненьні, а банкноты з грузу самалёта разьляцеліся па горадзе, што выклікала сутычкі паміж жыхарамі і сіламі бясьпекі.
ГЛЯДЗІЦЕ ТАКСАМА: У Катары ўпаў у мора вайсковы верталёт. Загінулі 7 чалавек