Польскі суд вынес рашэньне ў справе беларуса Алеся Папковіча аб яго высылцы ў Літву ў адпаведнасьці з Дублінскім палажэньнем. Алесь застанецца ў Польшчы са сваёй сям’ёй.
Апэляцыю падрыхтавала заснавальніца ініцыятывы Partyzanka Ганна Мацеўская. Суд зноў пагадзіўся з сур’ёзнымі парушэньнямі працэдуры ў справе і аргумэнтамі адносна індывідуальнай сытуацыі Алеся, адзначае тэлеграм-канал ініцыятывы.
На слуханьнях таксама прысутнічала дэпутатка Эўрапарлямэнту Магдалена Гасеўская, яна яшчэ раз падтрымала беларусаў, якія апынуліся ў цяжкім становішчы. Таксама на суд падтрымаць Папковіча прыйшло некалькі землякоў, якія жывуць у Польшчы.
Гэтае рашэньне дапаможа тым, чые справы закрываюцца «аўтаматычна» без належнай ацэнкі індывідуальных абставін. Мы працягнем сыстэматычна аспрэчваць такія рашэньні і дамагацца справядлівых практык, адзначыў канал ініцыятывы.
Дублінскі рэглямэнт дазваляе высылаць уцекача ў тую краіну Эўразьвязу, у якую той прыехаў на пачатку. Рэглямэнт і адзіная сыстэма дазваляе ЭЗ пазьбегчы выпадкаў, калі адзін чалавек падае заявы на прытулак адразу ў некалькіх краінах уніі, і таксама шукае там дапамогі.
ГЛЯДЗІЦЕ ТАКСАМА: Маці Кацярыны Ваданосавай застаецца ў Польшчы. Суд вынес канчатковае рашэньне