Сама меней 25 чалавек загінулі, яшчэ шэсьць атрымалі траўмы ў выніку пажару ў начным клюбе ў індыйскім штаце Гоа. Клуб Birch by Romeo Lane знаходзіцца ў пасёлку Арпора, непадалёк ад папулярнага пляжу.
Вядома, што 14 загінулых былі супрацоўнікамі ўстановы, яшчэ чатыры чалавекі — турыстамі. Асобы астатніх пакуль не ўстаноўлены.
Як піша The Times of India, са спасылкай на відавочцаў, пажар пачаўся каля паўночы — у гэты момант у клюбе знаходзілася каля ста чалавек. Паліцыя штату мяркуе, што прычынай узгараньня стаў выбух газавага балёна.
Кіраўнік ураду Гоа Прамод Савант заявіў, што выдадзены ордэр на арышт уладальнікаў клуба, а мэнэджар установы і іншыя асобы ўжо затрыманыя. Ён таксама дадаў, што распарадзіўся правесьці расьсьледаваньне і вызначыць, ці адпавядала будынак нормам пажарнай бясьпекі.
ГЛЯДЗІЦЕ ТАКСАМА: У Менску плянуюць усталяваць звыш 20 000 відэакамэраў на жылых дамах