Праваабарончы цэнтар «Вясна» паведаміў, што мае інфармацыю пра як мінімум 106 пацьверджаных фігурантаў «справы Гаюна», якіх зьмясьцілі пад варту.
Агульная ж лічба затрыманых значна большая. Затрыманьні адбываюцца па ўсёй Беларусі да гэтага часу. Па зьвестках «Вясны», напачатку кастрычніка затрымалі мінімум яшчэ дваіх мужчын.
«З пачатку верасьня ў «Сьпіс экстрэмістаў» дадалі 68 чалавек, асуджаных за «садзейнічаньне экстрэмізму». Гэта больш чым траціна ад усіх людзей, якіх дадалі ў сьпіс за гэты час. Частка з гэтых людзей – фігуранты «справы Гаюна», пра якіх невядома праваабаронцам», – паведамляе Вясна.
Па зьвестках праваабаронцаў, у Беларусі амаль кожны дзень адбываюцца суды па гэтай справе. Фігурантам прызначаюць як «хімію» з накіраваньнем, так і калёнію. Справы некаторых людзей перадаюць з Менску ў рэгіянальныя суды.
ГЛЯДЗІЦЕ ТАКСАМА: Украіна заклікала партнэраў узмацніць ціск на Лукашэнку за рэпрэсіі ў «справе Гаюна»Маніторынгавы праект «Беларускі Гаюн» перад спыненьнем працы меў амаль 350 тысяч падпісчыкаў.
З пачатку вайны ва Ўкраіне праект зьбіраў інфармацыю ад беларусаў, якія дасылалі ў бот канала ў тэлеграме зьвесткі аб перамяшчэньні войскаў і ваеннай тэхнікі. На «Беларускі Гаюн» спасылаліся СМІ, аналітыкі і вайсковыя выведкі. Зьвесткі дапамагалі ўкраінскаму боку арыентавацца ў становішчы і ацэньваць пагрозы.
5 лютага кіраўнік праекту Антон Матолька заявіў, што ў выніку несанкцыянаванага ўваходу быў атрыманы доступ да чату з ботам Гаюна, куды зьбіралася інфармацыя ад людзей.
Інфарматарам Беларускага Гаюна, паведамляюць праўладныя рэсурсы, пагражаюць тэрміны па артыкуле «здрада дзяржаве» – ад 7 да 15 гадоў.
Праваабаронцы прагназуюць, што колькасьць фігурантаў «справы Гаюна» можа дасягнуць 1000 чалавек.
ГЛЯДЗІЦЕ ТАКСАМА: «Вясна»: з 2020 года як найменей 8905 чалавек зьведала палітычны крымінальны перасьлед