Дата дня
16 ліпеня 1054 году — папскія легаты абвясьцілі адлучэньне ад царквы канстантынопальскага патрыярха Міхаіла Керуларыя, а ён пазьней — легатаў. Гэтая дата лічыцца пачаткам Вялікай схізмы, якая падзяліла хрысьціянскую царкву на дзьве часткі: каталіцкую і праваслаўную.
16 ліпеня 2021 — увайшло ў найноўшую гісторыю Беларусі як дзень масавай атакі на незалежную журналістыку. Сілавікі разграмілі менскі офіс Радыё Свабода, вырвалі камэры відэаназіраньня на паверсе і выламалі трое дзьвярэй у офісе. Канфіскавалі тэхніку. У той жа дзень адбыліся ператрусы ў журналістаў Свабоды, «Белсату» і іншых незалежных выданьняў.
Зламаныя дзьверы ў офіс Радыё Свабода ў Менску, 16 ліпеня 2021 году
Таксама ў гэты дзень
1941 — Нямецкія войскі ўварваліся ў Смаленск.
1945 — ЗША правялі першае пасьпяховае выпрабаваньне атамнай бомбы на палігоне ў штаце Нью-Мэксыка.
1951 — быў апублікаваны славуты раман «Лавец у жыце» амэрыканскага пісьменьніка Джэрома Сэлінджэра.
1990 — Вярхоўная Рада Ўкраіны прыняла Дэклярацыю аб дзяржаўным сувэрэнітэце.
1990 — Савет Міністраў БССР абвясьціў комплекс помнікаў гісторыі і культуры Полацку Полацкім гісторыка-культурным запаведнікам рэспубліканскага значэньня.
1990 — заснаваны музэй гісторыі Магілёва.
2005 — у Менску пачаўся IV зьезд беларусаў сьвету.
2018 — выбітны футбаліст ХХ стагодзьдзя аргентынец Дыега Марадона прыляцеў у Берасьце ў якасьці старшыні праўленьня мясцовага клюбу “Дынама”. Зрэшты, неўзабаве ён адляцеў у Мэксыку, маўляў, у Беларусі клімат вельмі суровы“. У лістападзе 2020 году Дыега Марадона памёр.
У гэты дзень нарадзіліся
1863 — Ціхан Кібардзін, беларускі архітэктар. Пад ягоным кіраўніцтвам у 1890 і 1902 гадах былі распрацаваныя генэральныя пляны забудовы Віцебску.
1872 — Руаль Амундсэн, нарвэскі падарожнік.
«Прадбачлівасьць і асьцярожнасьць аднолькава важныя: прадбачлівасьць — каб своечасова заўважыць цяжкасьці, а асьцярожнасьць — каб самым дбайным чынам падрыхтавацца да іх сустрэчы».
Руаль Амундсэн
1879 — Васіль Рагуля, беларускі грамадзка-палітычны дзяяч, пасол Сэйму і сэнатар у міжваеннай Польшчы.
1968 — Лары Сэнгер, адзін з заснавальнікаў Вікіпэдыі.
У памяці
1897 — Янка Лучына, паэт.
1959 — Іван Жалтоўскі, архітэктар.
1976 — Ян Станкевіч, беларускі мовазнавец, гісторык, палітычны дзяяч.
Ян Станкевіч. Падручнік крывіцкае (беларускае) мовы. Рэґенсбурґ, 1947.
1985 — Генрых Бёль, нямецкі пісьменьнік, ляўрэат Нобэлеўскай прэміі па літаратуры.
1989 — Гербэрт фон Караян, аўстрыйскі дырыжор.
1990 — Мікалай Арэхва, дзяяч рэвалюцыйнага руху ў Заходняй Беларусі, беларускі гісторык.
2005 — Яніна Каханоўская, дзяячка беларускай эміграцыі ў ЗША, бабуля сьпевака Данчыка.
Яніна Шабуня-Каханоўская (зьлева) і Натальля Арсеньнева на дэманстрацыі ў Дзень паняволеных народаў. Нью-Ёрк, 1954 год