Як адзначаецца ў паведамленьні прэсавай службы Лукашэнкі, гэтае рашэньне накіравана на рэалізацыю Кодэксу цывільнага судаводзтва, які прадугледжвае стварэньне трох зьвёнаў сыстэмы эканамічных судоў.
Такое структурнае пераўтварэньне адбудзецца за рахунак падзелу дзейнасьці судоў першай і апэляцыйнай інстанцыяў, якія цяпер функцыянуюць у рамках аднаго суду.
Апэляцыйны эканамічны суд у статусе працэсуальнага органу пачне сваю працу з 1 студзеня 2026 году, калі набудзе моц Кодэкс цывільнага судаводзтва.
Суд плянуюць сфармаваць з судзьдзяў і працаўнікоў іншых судоў. У ім будуць працаваць 27 судзьдзяў разам з старшынём і яго намесьнікамі.
Кандыдатуры на судзьдзяў Апэляцыйнага эканамічнага суду павінен прапанаваць Вярхоўны суд. Апроч таго, Вярхоўны суд павінен вырашыць неабходныя арганізацыйныя пытаньні для забесьпячэньні дзейнасьці новага судовага органу.
ГЛЯДЗІЦЕ ТАКСАМА: Без суду. Што адбылося зь беларускай судовай сыстэмай пасьля жніўня 2020 году