Як паведаміла прэсавая служба АПК, Ціханоўская сустрэлася з генэральным сакратаром NATO Енсам Столтэнбэргам. У сустрэчы таксама браў удзел Валер Кавалеўскі.
Таксама ў рамках Паўночнаатлянтычнай Рады Сьвятлана Ціханоўская правяла брыфінг для сталых прадстаўнікоў усіх краін – удзельніц альянсу дзеля абмену думкамі аб крызісе ў Беларусі і аб пэрспэктывах дыялёгу дэмакратычнага руху Беларусі і NATO ў палітычных пытаньнях.
Сьвятлана Ціханоўская па выніках сустрэчы заявіла:
«Я радая, што гэта сустрэча адбылася і што ў дэмакратычных сіл Беларусі завязваецца такі дыялёг. У падмурак Альянсу закладзеныя блізкія для беларусаў каштоўнасьці: індывідуальная свабода, правы чалавека, дэмакратыя і вяршэнства права.
Я думаю, для кожнай эўрапейскай краіны неабходна выбудоўваць паважлівыя, канструктыўныя адносіны з NATO. Гэта важна для нацыянальных інтарэсаў і падтрыманьня рэгіянальнай бясьпекі. Мне б хацелася, каб Беларусь успрымалі як надзейнага мірнага прадказальнага партнэра».
Валер Кавалеўскі, намесьнік кіраўніцы АПК, прадстаўнік па замежных справах Кабінэта заявіў:
«Пачатак дыялёгу з NATO стаў вынікам працы Кабінэта ў пашырэньні супрацоўніцтва зь міжнароднымі арганізацыямі. На працягу ўжо 75 гадоў NATO зьяўляецца найважнейшым фактарам бясьпекі і стабільнасьці ў Эўропе. Мы абавязаныя інфармаваць міжнародную супольнасьць пра выклікі для нашай краіны».
ГЛЯДЗІЦЕ ТАКСАМА:
Ціханоўская: Расея паглынае эканоміку, вайсковую, культурную і мэдыйную прастору БеларусіГЛЯДЗІЦЕ ТАКСАМА:
Ціханоўская назвала тры магчымыя сцэнары пераменаў у Беларусі