Парлямэнцкая асамблея Рады Эўропы прыняла рэзалюцыю, якая заклікае перадаць замарожаныя расейскія актывы ў спэцыяльны фонд, адкуль у далейшым яны будуць накіраваныя на аднаўленьне Ўкраіны. За гэтае рашэньне аднагалосна прагаласавалі ўсе 134 дэлегаты, якія прысутнічалі на пасяджэньні.
Тэкст рэзалюцыі і дэталі таго, як будзе выконвацца прынятае рашэньне, ПАРЭ абяцала абнародаваць пазьней.
У сакавіку Эўрапейская камісія, выканаўчы орган ЭЗ, прапанавала выкарыстоўваць 90% даходаў ад замарожаных актываў Расеі для аказаньня вайсковай дапамогі Ўкраіне. Падобная мера дазволіць выдзяляць Украіне штогод каля 3 мільярдаў эўра.
Гэтая прапанова абмяркоўвалася на апошнім саміце ЭЗ у сакавіку. Аднак канчатковага рашэньня тады не прынялі.
Расея ахарактарызавала плян ЭЗ як «бандытызм і крадзеж».
Пытаньне выкарыстаньня замарожаных расейскіх актываў для дапамогі Ўкраіне будзе абмяркоўвацца на сустрэчы краін «Групы сямі» ў сераду, 17 красавіка. Пра гэта паведаміла кіраўніца Мінфіну ЗША Джанэт Елен.
Украіна мае патрэбу ў пастаяннай падтрымцы, і менавіта гэта павінна паслужыць стымулам выкарыстоўваць замарожаныя расейскія актывы, падкрэсьліла Елен.
Паводле яе, разглядаюцца некалькі варыянтаў: ад поўнай канфіскацыі, якую падтрымліваюць ЗША, да выкарыстаньня ў якасьці закладу па крэдытах або аблігацыях, выпушчаных для аказаньня дапамогі Ўкраіне.
Раней брытанскі міністар замежных спраў Дэвід Кэмеран заявіў, што Лёндан гатовы перадаць Кіеву ўсе замарожаныя актывы расейскага Цэнтрабанку ў выглядзе пазыкі з улікам таго, што пасьля заканчэньня вайны Расеі давядзецца выплачваць рэпарацыі.
Як расказаў Reuters высокапастаўлены супрацоўнік Мінфіна ЗША, ніводны з варыянтаў ня выключаны з разгляду, але адзначыў, што ва Ўкраіны ня будзе магчымасьці выкарыстоўваць усю суму адразу, нават калі ўсе замарожаныя актывы канфіскуюць.
- Краіны «Вялікай сямёркі» ўжо больш за год вядуць дыскусіі наконт таго, ці можна канфіскаваць замарожаныя актывы расейскага Цэнтрабанку, не падрываючы пры гэтым даверу да міжнароднай фінансавай сыстэмы.
- У заходніх краінах замарожана каля 300 мільярдаў даляраў рэзэрваў Цэнтральнага банку Расеі. За 2023 год міжнародны дэпазытарый Euroclear зарабіў 4,4 млрд эўра, інвэстуючы расейскія актывы, замарожаныя па рашэньні Эўразьвязу.
- Масква ня можа скарыстацца ні актывамі, ні заробленымі адсоткамі.