Як піша баўгарская служба Радыё Свабода, тром расейцам, альбанцу і беларусу выставілі абвінавачаньні ва ўдзеле ў арганізаванай злачыннай групе, якая вывозіла тавары ў Расею ў парушэньне заходніх санкцыяў, уведзеных супраць Масквы ў сувязі з вайной ва Ўкраіне.
Пра гэта ў сераду паведаміла Баўгарскай нацыянальнай тэлевізіі акруговая пракурорка Плоўдзіва Ваня Хрыстэва. Напярэдадні пракуратура, МУС і Дзяржаўнае агенцтва нацыянальнай бясьпекі заявілі, што разгромлена злачынная група з 12 чалавек, якая вазіла тавар расейскім наймітам, што ваююць на тэрыторыі Ўкраіны, напрыклад «Вагнэру».
«Затрыманыя 12 чалавек, пазьней да крымінальнай адказнасьці прыцягнутыя 5 чалавек – грамадзяне Расейскай Фэдэрацыі, грамадзянін Альбаніі і грамадзянін Беларусі», – сказала пракурорка Хрыстэва.
Акцыя адбылася ў Плоўдзіве, Сафіі, Варне і Вялікім Тырнаве. У сераду акруговая пракуратура Плоўдзіва падала ў суд хадайніцтва аб бестэрміновым арышце пяці абвінавачаных іншаземцаў.
Хрыстэва таксама паведаміла, што злачынная група дзейнічала праз зарэгістраваную ў Плоўдзіве фірму, ад імя якой закупляліся тавары двайнога прызначэньня. Сярод іх аптычныя прылады, прыцэлы, біноклі, радыёстанцыі.
Паводле яе, гэтыя рэчы затым перапакоўвалі ў кватэры ў Плоўдзіве і транспартавалі ў валізках і сумках у аэрапорт Сафіі, празь які іх спрабавалі вывезьці.
Аднак Агенцтва нацыянальнай бясьпекі і МУС не дапусьцілі гэтага.
Паводле неафіцыйнай інфармацыі Свабоднай Эўропы, фірма, празь якую ішла гэтая дзейнасьць, называецца «Афлон». Камэрцыйны рэестар сьведчыць, што яна афіцыйна належыць грамадзянам Грэцыі.