У асабістым кабінэце Джо Байдэна ў аналітычным Цэнтры дыпляматыі і глябальнага ўзаемадзеяньня Пэн-Байдэн у Вашынгтоне і ў ягоным доме ў горадзе Ўілмінгтан, штат Дэлавэр, выявілі сакрэтныя дакумэнты, якія тычацца пэрыяду, калі Байдэн займаў пасаду віцэ-прэзыдэнта ў адміністрацыі Барака Абамы (2009-2017). Міністэрства юстыцыі пачало праверку наконт парушэньня закону аб прэзыдэнцкіх архівах: ён загадвае перадаваць усе дакумэнты — і сакрэтныя, і не сакрэтныя — у Нацыянальны архіў пасьля зьмены адміністрацыі ЗША.
Памочнікі Байдэна знайшлі сакрэтныя паперы, калі правяралі дакумэнты перад пераездам цэнтру з аднаго памяшканьня ў іншае. Пасьля гэтага агледзелі і ягоны дом. Сярод дакумэнтаў, у тым ліку, дадзеныя выведкі і матэрыялы брыфінгаў, якія датычацца іншых краін, уключаючы Ўкраіну, Іран і Вялікабрытанію.
Белы дом распаўсюдзіў заяву ад імя дарадцы прэзыдэнта Рычарда Сабера, у якой гаворыцца, што дакумэнты захоўваліся ў каморы ў гаражы дома і ў суседнім зь ім памяшканьні — сярод іншых асабістых і афіцыйных папер. Юрысты прэзыдэнта запэўніваюць, што пра сакрэтныя дакумэнты неадкладна апавясьцілі міністэрства юстыцыі ЗША.
ГЛЯДЗІЦЕ ТАКСАМА: Байдэн падпісаў бюджэт на 2023 год, які ўключае каля 45 млрд даляраў дапамогі Ўкраіне і краінам NATOЯк паведамляе CNN, на брыфінгу 12 студзеня журналісты спыталіся Байдэна, як ён ставіцца да таго, што сакрэтныя дакумэнты захоўваліся ў гаражы «побач з ягоным „Карвэтам“». Байдэн адказаў: «Мой „Карвэт“ стаіць у замкнёным гаражы, ок? Так што яны не ляжалі проста на вуліцы». Раней Байдэн казаў, што «быў зьдзіўлены», калі даведаўся, што ў яго офісе ў аналітычным цэнтры знайшлі сакрэтныя дакумэнты. Ён адзначаў, што яму невядомы зьмест гэтых папер і што ён вельмі сур’ёзна ставіцца да захоўваньня сакрэтнай інфармацыі.
Генпракурор ЗША прызначыў спэцпракурора для правядзеньня расьсьледаваньня. Раней гэтак адбылося з былым прэзыдэнтам Дональдам Трампам. Пасьля сваёй адстаўкі ў пачатку 2021 году Трамп забраў з сабой вялікую колькасьць дакумэнтаў, адмовіўшыся перадаць іх у Нацыянальны архіў. Мінюст і Нацыянальны архіў 20 месяцаў дамагаліся вяртаньня гэтых папер, пакуль ведамства не атрымала ордэр на ператрус рэзыдэнцыі Трампа ў Флорыдзе. У выніку ператрусу, які адбыўся 8 жніўня, супрацоўнікі ФБР канфіскавалі 11 скрыняў сакрэтных дакумэнтаў. У дачыненьні да Трампа вядзецца расьсьледаваньне, зьвязанае з магчымым парушэньнем закону аб шпіянажы.
ГЛЯДЗІЦЕ ТАКСАМА: ФБР правяло вобшук у рэзыдэнцыі Трампа ў Флорыдзе