У нядзелю, 18 сьнежня, кіраўнік Украіны Уладзімір Зяленскі правёў чарговае пасяджэньне Стаўкі Вярхоўнага галоўнакамандуючага, на якім асаблівая ўвага была нададзена сытуацыі ў Беларусі, паведамляе прэс-служба ўкраінскага прэзыдэнта ў Тэлеграме.
Паводле інфармацыі ведамства, падчас пасяджэньня штабу камандуючыя войскамі апэратыўных напрамкаў далажылі пра абстаноўку на фронце, асобна спыніўшыся на найбольш гарачых раёнах.
Чальцы штабу таксама зьвярнулі ўвагу на сытуацыю ў Беларусі: у прыватнасьці, яны заслухалі інфармацыю «пра рэальную колькасьць і ўзбраеньне варожых груповак». Больш дэталяў не паведамляецца.
«На стаўцы дэталёва абмеркавалі мяжу. Абарона мяжы як з Расеяй, так і зь Беларусьсю — гэта таксама пастаянны прыярытэт. Рыхтуемся да ўсіх магчымых абарончых сцэнараў, хто б да чаго ні схіляў Менск. Гэта ім таксама не дапаможа, як і усе іншыя хворыя ідэі ў гэтай вайне супраць Украіны і ўкраінцаў», — сказаў Зяленскі пасьля пасяджэньня.
ГЛЯДЗІЦЕ ТАКСАМА: Украінскае камандаваньне: На сустрэчы Пуціна і Лукашэнкі будзе абмяркоўвацца прыцягненьне беларускай арміі да апэрацыі на сушы ГЛЯДЗІЦЕ ТАКСАМА: Расея рыхтуе новы наступ на Ўкраіну? Былы афіцэр Генэральнага штабу УСУ: шанцы расейскага войска дабрацца да Кіева нязначныя