У Латвіі заблякуюць расейскія сацсеткі «Вконтакте», «Одноклассники» і «Мой мир». Пра гэта ў Твітэры напісаў кіраўнік Нацыянальнай рады электронных СМІ Іварс Абаліньш.
Рашэньне прынята ў сувязі з уведзенымі Эўразьвязам санкцыямі. Як растлумачылі ў Нацыянальнай радзе, згодна з наяўнай інфармацыяй, гэтыя сацсеткі знаходзяцца ва ўласнасьці і пад кантролем Юрыя Кавальчука і Ўладзіміра Кірыенкі, у дачыненьні да якіх ЭЗ увёў санкцыі.
Фізычнае блякаваньне плятформаў адбудзецца на наступным тыдні.
Par NEPLP lēmumu saistībā ar ES sankcijām pic.twitter.com/LyrDQpT7xK
— Ivars Āboliņš (@Ivars_Abolins) May 12, 2022
Кантроль над карпарацыяй VK, якая валодае ўсімі трыма сацсеткамі, маюць «Газпром-мэдыя» і страхавая група «Согаз», найбуйнейшымі ўладальнікамі якіх зьяўляюцца ў тым ліку сябар Уладзіміра Пуціна Юрый Кавальчук і яго сям’я, пляменьнік прэзыдэнта Расеі Міхаіл Шаламаў і «Газпром». На чале кампаніі VK стаіць Уладзімір Кірыенка — сын першага намесьніка кіраўніка адміністрацыі прэзыдэнта Сяргея Кірыенкі.
ГЛЯДЗІЦЕ ТАКСАМА: У ААН прагаласавалі за тое, каб расьсьледаваць меркаваныя злачынствы расейскіх вайскоўцаў ва Ўкраіне