Затрымалі Тацяну 4 жніўня.
«Я была дома — да мяне прыйшлі раніцай, а 7.30. Правялі вобшук там, дзе я жыву, а потым яшчэ ў бацькоў, дзе я прапісана. Забралі тэхніку і, паколькі ў мяне шмат тэкставага матэрыялу, некалькі кніжак, паперы. У бацькоў забралі старыя паперы, якія былі ў маім пакоі», — расказвае Тацяна і дадае, што ў цэлым усё прайшло карэктна.
Паводле сацыёляга, умовы на Акрэсьціна для палітычных застаюцца нечалавечымі: ні матрацаў, ні пасьцелі, кругласуткава ўключанае сьвятло. Перадачу Тацяна атрымала. А дзяўчатам, што з ёй сядзелі, аддалі рэчы, якія сваякі ім пакінулі тыдзень таму.
«Такія ўмовы — гэта дадатковы ціск і спроба паказаць, у тым ліку іншым жыхарам гэтай установы, што вось хто самыя злачынцы. І гэта абсалютна непрымальна. Супрацоўнікі ведаюць, што павінны выконваць унутраныя правілы, бо калі зь імі размаўляеш пра матрацы і бялізну, яны кажуць: „Ну вы ж разумееце“. У камэры палова сядзела па справах палітычных, а палова — па звычайных крымінальных, накшталт невялікіх крадзяжоў. Ім не пашанцавала, што яны патрапілі да нас. Для іх гэта было дадатковае пакараньне, і некаторыя ўсё спрабавалі з ахоўнікамі дамовіцца, каб іх перавялі ў нармальную камэру».
Адной з сукамэрніц Тацяны была Надзея Калач — дударка гурта Irdorath. Дзяўчыну перавялі на Валадарку. Надзею і іншых музыкаў гурта затрымалі на лецішчы, калі яны сьвяткавалі яе дзень народзінаў.
«Гэта сытуацыя для яе была вялікім шокам. І тыя абвінавачваньні, якія прад’яўляюцца, і сам спосаб, у які яны прад’яўляюцца, калі інтэлігентных, культурных людзей гвалтоўна затрымліваюць», — дзеліцца Вадалаская.
Да чаго рыхтавацца ёй самой, сацыёляг не разумела, піша «Наша Ніва». Вадалаская застаецца падазраванай па артыкуле 342 КК.