Арышт Марфе Рабковай падоўжылі яшчэ на два месяцы, паведамляе Праваабарончы цэнтар «Вясна». Папярэдні тэрмін утрыманьня пад вартай скончыўся 17 студзеня.
Валянтэрку Праваабарончага цэнтру «Вясна» затрымалі 17 верасьня ў Менску разам з мужам, калі яны вярталіся з урачыстага ўзнагароджаньня «Вясны» польскай прэміяй «Арол» імя Яна Карскага. Рабкову пакінулі пад вартай і неўзабаве прад’явілі ёй абвінавачаньне паводле ч. 3 арт. 293 Крымінальнага кодэксу — «навучаньне ці іншая падрыхтоўка асоб для ўдзелу ў масавых беспарадках, альбо фінансаваньне такой дзейнасьці». Па такім артыкуле чалавеку пагражае пазбаўленьне волі на тэрмін да 3 гадоў.
У абарону Рабковай і з заклікам да беларускіх уладаў аб неадкладным вызваленьні праваабаронцы выступілі беларуская праваабарончая супольнасьць, спэцдакладчыкі ААН і шэраг міжнародных арганізацый. Amnesty International абвясьціла тэрміновую акцыю, патрабуючы ад беларускіх уладаў яе неадкладнага вызваленьня.
ГЛЯДЗІЦЕ ТАКСАМА: Актывістцы «Вясны» Марфе Рабковай падоўжылі арышт, яе лісты на волю прыходзяць напалову выкрасьленыя цэнзарам ГЛЯДЗІЦЕ ТАКСАМА: У 2020 годзе ўлады рэпрэсавалі 18 сяброў і валянтэраў Праваабарончага цэнтру «Вясна»