Амэрыканскі касьмічны карабель Starliner знаходзіцца на незаплянаванай, але ўстойлівай арбіце. Абноўленая інфармацыя пра гэта разьмешчана на сайце NASA.
У пятніцу 20 сьнежня, пасьля пасьпяховага запуску ракеты-носьбіта Atlas V з выпрабавальным бесьпілётным варыянтам карабля Starliner, узьнікла няштатная сытуацыя — карабель ня выйшаў на зададзеную арбіту.
Канструктары і інжынэры пачалі вывучаць магчымасьці бясьпечнага вяртаньня апарата на Зямлю з разьліковым пунктам прызямленьня Ўайт-Сэндс, штат Нью-Мэксыка.
ГЛЯДЗІЦЕ ТАКСАМА: NASA паказала новы скафандар, у якім амэрыканцы паляцяць на Месяц
«Старлайнэр», разам з «Кру Дрэган» SpaceX — адзін з двух пілятаваных касьмічных караблёў, якія распрацоўваюць прыватныя кампаніі для дастаўкі экіпажаў на Міжнародную касьмічную станцыю. Яны павінны зьмяніць расейскія «Саюзы», распрацаваныя ў 60-я гады XX стагодзьдзя. «Саюзы» застаюцца цяпер адзіным відам транспарту для дастаўкі чалавека ў космас.
У тэставым палёце на борце няма экіпажу. На МКС «Старлайнэр» вязе 270 кіляграмаў грузу, у тым ліку калядныя падарункі для экіпажу МКС, абсталяваньне для тэстаў на радыяцыю і манэкен Розі.
У будучыні карабель зможа перавозіць на арбіту да сямі чальцоў экіпажу.