Міністарка ў справах бюджэту Сафі Вільмэс зьменіць на пасадзе выканаўцу абавязкаў бэльгійскага прэм’ера Шарля Мішэля, абранага старшынёй Эўрапейскай рады, паведамляе Deutsche Welle.
Кароль Бэльгіі Філіп 27 кастрычніка прызначыў выканаўцай абавязкаў прэмʼер-міністра краіны Сафі Вільмэс, міністарку ў справах бюджэту і дзяржслужбы Бэльгіі. Яна стала першай жанчынай, якая ўзначаліла ўрад каралеўства.
Вільмэс зьменіць на гэтай пасадзе лідэра партыі «Рэфарматарскі рух» Шарля Мішэля. Ён быў абраны старшынёй Эўрапейскай рады і пачне выконваць свае абавязкі з 1 сьнежня.
Сафі Вільмэс належыць да палітыкаў-лібэралаў.
У сьнежні 2018 году ў Бэльгіі пачаўся ўрадавы крызіс. Кансэрватыўная нацыяналістычная партыя «Новы флямандзкі альянс» выйшла з кіроўнай кааліцыі з прычыны рознагалосьсяў з кіраўніком ураду ў пытаньні міграцыйнага пакту ААН. Пасьля гэтага ў краіне ўзьнік урад меншасьці, вымушаны абапірацца на галасы апазыцыі ў парлямэнце. Прашэньне Шарля Мішэля аб адстаўцы, пададзенае тады ж, прыпыніў кароль.