Вялікабрытанія і Эўрапейскі зьвяз дасягнулі кампрамісу на дадатковых перамовах пра пагадненьне наконт выхаду Брытаніі з ЭЗ. На сустрэчы брытанскай прэм’ер-міністаркі Тэрэзы Мэй з кіраўніком Эўракамісіі Жан-Клёдам Юнкерам і кіраўніком дэлегацыі ЭЗ на перамовах Мішэлем Барні ў Страсбуры былі ўзгоднены «юрыдычна абавязковыя зьмены» ў пагадненьні пра Брэксыт.
У прыватнасьці, Лёндан і Брусэль дамовіліся пра адсутнасьць кантролю на мяжы паміж Паўночнай Ірляндыяй, якая ўваходзіць у склад Вялікабрытаніі, і Ірляндыяй у складзе Эўразьвязу. Новае пагадненьне па гэтым пытаньні павінна быць заключана да сьнежня 2020 году.
Юнкер пацьвердзіў дасягненьне дамоўленасьці зь Лёнданам. Аб гэтым кіраўнік Эўракамісіі напісаў у твітэры.
Our agreement provides meaningful clarifications & legal guarantees to the Withdrawal Agreement & #backstop. The choice is clear: it is this deal, or #Brexit may not happen at all. Let’s bring the UK’s withdrawal to an orderly end. We owe it to history. https://t.co/lfy9eehEZi pic.twitter.com/XCqcLwZV7V
— Jean-Claude Juncker (@JunckerEU) March 11, 2019
Юнкер падкрэсьліў, што ўзгодненыя дапаўненьні да дамовы пра Брексыт зьяўляюцца самай апошняй прапановай з боку Эўразьвязу. «Трэцяга шанцу не будзе», — сказаў кіраўнік Эўракамісіі. «Выбар просты: альбо гэтая ўгода, альбо Брэксыт можа ўвогуле не адбыцца», — заявіў Юнкер.
Дасягнутыя ў Страсбуры пагадненьні сёньня будуць вынесены на галасаваньне ў брытанскім парлямэнце. Раней Мэй абяцала парлямэнту, што ў выпадку, калі праект пагадненьня будзе адхілены, яна на гэтым жа тыдні прапануе дэпутатам выбраць паміж выхадам з Эўразьвязу 29 сакавіка ўвогуле без пагадненьня альбо пераносам даты Брэксыту на канец чэрвеня, каб выйграць час. Ніводны з гэтых варыянтаў, на думку прэм’ер-міністаркі, не зьяўляецца аптымальным.
ГЛЯДЗІЦЕ ТАКСАМА: Туск кажа пра «асаблівае месца ў пекле» для тых, хто прасоўваў Брэксыт бяз плянуДата выхаду Брытаніі з ЕС — 29 сакавіка — цяпер вызначаная законам. Апазыцыя ў парлямэнце, у тым ліку яе вядучая сіла — лейбарысты — выступаюць за паўторны рэфэрэндум па Брэксыце. Частка ж кіруючых кансэрватараў, якія выступаюць за Брэксыт, не жадае галасаваць за праект пагадненьня з ЭЗ, лічачы яго нявыгадным для Брытаніі. Раней парлямэнт даручыў Мэй дамагчыся ад ЭЗ саступак прынамсі ў пытаньні аб мяжы з Ірляндыяй.
ГЛЯДЗІЦЕ ТАКСАМА: «Бяз роднай мовы ў Ірляндыі палітычнай кар’еры ня зробіш». Праўда і міты пра адраджэньне ірляндзкай мовы