Памочнік прэзыдэнта ЗША ў пытаньнях нацыянальнай бясьпекі таксама адзначыў, што ня лічыць саміт, які завяршыўся ў Ханоі, няўдалым.
Прэзыдэнт ЗША Дональд Трамп гатовы зноў сустрэцца зь лідэрам КНДР Кім Чэн Ынам, калі для гэтага настане зручны момант, пры гэтым прапановы Вашынгтону ў справе дэнуклеарызацыі Карэйскага паўвостраву ня маюць тэрміну дзеяньня. Пра гэта заявіў памочнік прэзыдэнта ЗША ў пытаньнях нацыянальнай бясьпекі Джон Болтан у інтэрвію тэлеканалу CBS, тэкст якога быў апублікаваны ў нядзелю.
«Тэрміну дзеяньня няма. Як я сказаў, прэзыдэнт цалкам гатовы да таго, каб працягваць перамовы на больш нізкім узроўні або зноў сустрэцца з Кім Чэн Ынам, калі для гэтага настан зручны час», — сказаў ён.
ГЛЯДЗІЦЕ ТАКСАМА: Трамп: перамовы з Кімам праваліліся з прычыны санкцыяўБолтан таксама адзначыў, што ня лічыць саміт, які завяршыўся ў Ханоі, няўдалым. «Я не разглядаю гэты саміт як правалены, — падкрэсьліў памочнік прэзыдэнта. — Я абсалютна не лічу гэта няўдачай, улічваючы, што нацыянальныя інтарэсы ЗША засталіся абароненыя».
Болтан лічыць, што вынік саміту ў Ханоі быў выгадны для Вашынгтону больш, чым для Пхэньяну. Пра гэта ён паведаміў у этэры CNN.