Мірная дамова з Расеяй будзе падпісаная толькі пасьля дакладнага вызначэньня межаў «паўночных тэрыторый» — чатырох астравоў Курыльскай грады: Кунашыр, Шыкатан, Ітуруп і Хабамаі. Пра гэта заявіў прэм’ер-міністар Японіі Сіндза Абэ, паведамляе тэлеканал NHK.
Пры гэтым кіраўнік ураду адмовіўся адказваць на пытаньне пра магчымую перадачу Японіі толькі двух астравоў (Шыкатан і Хабамаі) замест чатырох. «Заключыць мірную дамову — значыць вызначыць мяжу», — канстатаваў Сіндза Абэ.
Японія дзесяцігодзьдзямі аспрэчвае прыналежнасьць чатырох астравоў Курыльскай грады, акупаваных СССР у канцы Другой сусьветнай вайны. Праз тэрытарыяльную спрэчку Расея і Японія дагэтуль не падпісалі мірнага пагадненьня.
Спрэчныя тэрыторыі
Пасьля студзеньскіх перамоваў Сіндза Абэ і Ўладзіміра Пуціна стала вядома, што Токіё можа вярнуцца да дэклярацыі 1956 году, згодна зь якой Масква пагаджалася перадаць Шыкатан і Хабамаі.
Новая сустрэча кіраўнікоў дзьвюх дзяржаў заплянаваная на чэрвень. Расея раней заявіла, што галоўнае ня тое, хто каму што перадасьць, а заключэньне мірнай дамовы, якая нарэшце завершыць Другую сусьветную вайну.