Эстонскага праваабаронца, актывіста міжнароднага фіна-вугорскага руху Олівэра Лодэ расейскія памежнікі не пусьцілі ў Расею. Забарона ініцыяваная ФСБ.
Лодэ, які ўзначальвае «Цэнтр разьвіцьця карэнных народаў URALIC», павінен быў узяць удзел у сэмінары аб фіна-вугорскіх мовах у горадзе Кінгісэп у Ленінградзкай вобласьці. Як напісаў Лодэ ў фэйсбуку, яму было прад’яўлена апавяшчэньне аб забароне на ўезд у Расею да 25 кастрычніка 2073 года.
Як падлічыў праваабаронца, калі ён дажыве да гэтага часу, то зможа ўехаць у Расею ў 99 гадоў.
Раней Лодэ стаў адным з ініцыятараў стварэньня міжнароднага руху вызваленьня анэксаванага Расеяй Крыму, у якім ён супрацоўнічае з прадстаўнікамі крымскіх татараў.