Паліцыя Мюнхэна адкрыла справу пасьля акцыі брытанскага журналіста Грэма Філіпса на магіле ідэоляга ўкраінскага нацыяналістычнага руху Сьцяпана Бандэры. Аб гэтым паведамляецца на афіцыйнай старонцы консульства Украіны ў Мюнхэне ў фэйсбуку.
«Інфармуем, што консульства зьвязалася з упраўленьнем паліцыі Мюнхэна з інфармацыяй аб дадзеным інцыдэнце і просьбай аб адпаведным рэагаваньні. У выніку была адкрытая справа і прынятыя неабходныя апэратыўна-сьледчыя і працэсуальныя дзеяньні», — адзначаецца ў заяве дыпляматаў.
15 кастрычніка, у дзень гадавіны сьмерці Сьцяпана Бандэры, брытанскі журналіст Грэм Філіпс, які супрацоўнічае з расейскім дзяржаўным каналам RT, разьмясьціў у сваіх сацыяльных сетках відэа зь яго магілы ў Мюнхэне. На відэа Філіпс мяняе ўкраінскі сьцяг на магіле на надпіс на ангельскай мове «Тут пахаваны ўкраінскі нацыст Сьцяпан Бандэра».
Today in Munich, I corrected the grave of Ukrainian Nazi Stepan Bandera, to comply with German law, which forbids shrines to Nazis. Corrected.#Bandera #StepanBandera #Nazism pic.twitter.com/M6vH14NPEQ
— Graham W Phillips (@GrahamWP_UK) 15 października 2018
Сам Філіпс заявіў у твітары, што паліцыя Мюнхэна ня зьвязвалася зь ім. «Выпраўленьне нацызму — гэта не злачынства, а грамадзкая служба», заявіў ён.
Сьцяпан Бандэра — украінскі палітычны дзеяч, адзін з ідэолягаў і тэарэтыкаў украінскага нацыяналістычнага руху XX стагодзьдзя. У 1959 годзе ён быў забіты ў Мюнхэне агентам КДБ Багданам Сташынскім.