Улады ЗША расьсьледуюць факт адпраўкі амэрыканскім чыноўнікам лістоў з падазроным зьмесьцівам.
Сакрэтная служба ЗША пацьвердзіла, што перахапіла падазроны канвэрт зь невядомым рэчывам, які прызначаўся прэзыдэнту ЗША Дональду Трампу. Сакрэтная служба адмовілася ад далейшых камэнтароў, заявіўшы, што яна «сумесна з супрацоўнікамі праваахоўных органаў расьсьледуе гэтую сытуацыю».
Канвэрт ня трапіў у Белы дом: ён быў кваліфікаваны як «падазроны» яшчэ на пошце і ФБР забрала яго на праверку.
Раней стала вядома, што два падазроныя канвэрты, дасланыя ў Пэнтагон, паступілі 1 кастрычніка ў цэнтар сартаваньня пошты для вайсковага ведамства краіны. Яны былі адрасаваныя міністру абароны ЗША Джэймсу Мэтысу, а таксама начальніку штабу ВМС адміралу Джону Рычардсану. Пачатковыя тэсты выявілі ў іх сьляды таксычнага рэчыва рыцыну. Ніводзін з адрасатаў не атрымаў падазронай карэспандэнцыі.
Рыцын — магутны яд расьліннага паходжаньня, які часта выкарыстоўваецца тэрарыстамі ў якасьці хімічнай зброі.