Беларусь на цырымоніі ў ЗША прадставіць намесьнік міністра замежных спраў.
На памятнай цырымоніі да 100-годзьдзя ўступленьня ЗША ў Першую ўсясьветную вайну Беларусь будзе прадстаўляць намесьнік міністра замежных спраў Алег Краўчанка.
Пра гэта агенцтву БелТА паведаміў прэс-сакратар МЗС Беларусі Дзьмітры Мірончык.
Камісія ЗША ў правядзеньні мерапрыемстваў з нагоды памятнай даты накіравала запрашэньне беларускаму боку ўзяць удзел у міжнароднай цырымоніі «Ахвяруючы ў імя свабоды і міру» разам зь іншымі дэлегацыямі. Мерапрыемства адбудзецца 6 красавіка ў Канзас-Сіці, штат Місуры.
На ўрачыстасьць сярод іншых быў запрошаны і Аляксандар Лукашэнка — як кіраўнік адной з краінаў, што былі ўцягнутыя ў Першую ўсясьветную вайну.
Пра запрашэньне стала вядома 24 сакавіка.