Робэрт Крафт, уладальнік каманды амэрыканскай футбольнай лігі «New England Patriots», расказаў тэлеканалу Fox News, што ня траціць надзеі вярнуць сабе пярсьцёнак пераможцы Супэркубка, які прэзыдэнт Расеі Ўладзімір Пуцін узяў у яго яшчэ ў 2005 годзе.
Крафт дадаў, што разьлічвае ў гэтай справе на дапамогу прэзыдэнта ЗША Дональда Трампа, зь якім яны ў добрых адносінах.
Паводле Крафта, у 2005 годзе падчас сустрэчы з Ўладзімірам Пуціным у Санкт-Пецярбургу, ён даў расейскаму прэзыдэнту памераць гэты пярсьцёнак коштам 25 тысяч даляраў і не атрымаў яго назад. Пуцін нібыта адказаў яму: «Я мог бы забіць некага гэтым пярсьцёнкам». І потым, паводле вэрсіі Крафта, расейскі прэзыдэнт паклаў пярсьцёнак у кішэню і адышоў у суправаджэньні трох агентаў аховы.
Крафт кажа, што зьвяртаўся ў адміністрацыю тагачаснага прэзыдэнта ЗША Джорджа Буша-малодшага яшчэ ў той час, каб яму дапамаглі вярнуць пярсьцёнак. Там яму нібыта сказалі, што ў інтарэсах амэрыканска-расейскіх адносін было б добра, каб ён схацеў падараваць гэты пярсьцёнак. На гэта Крафт кажа: «Але я не хацеў [падараваць]. У мяне эмацыянальная прывязанасьць да гэтага пярсьцёнка, на ім маё імя. Я не хачу пабачыць яго на eBay».
Крафт сказаў Fox News, што ён гатовы зрабіць яшчэ адзін такі пярсьцёнак і выгравіраваць на ім імя Пуціна, каб абмяняць яго на свой. У гэтым абмене, паводле Крафта, яму мог бы дапамагчы Дональд Трамп, калі сустрэнецца з Уладзімірам Пуціным.