У лягеры для мігрантаў у францускім горадзе Кале пасьля пачатку работ па дэмантажы застаюцца ня менш за 100 беспрытульных дзяцей, нягледзячы на заявы мясцовых уладаў, што лягер ужо пусты. Пра гэта паведамляе тэлеканал ВВС.
Валянцёры стварылі прытулак і заклікалі францускія ўлады расьсяліць дзяцей. На гэтым тыдні з лягера эвакуіравалі больш за 5500 мігрантаў, зь іх — паўтары тысячы непаўналетніх. Працы па зносе нелегальнага лягера пачаліся ў панядзелак і працягваюцца цяпер. Тэрыторыя ачэплена паліцыяй, як паведамляе агенцтва Франс-Прэс.
У імправізаваным лягеры ў горадзе Кале знаходзіліся ня менш за 6 тысяч нелегальных мігрантаў з краін Афрыкі і блізкага Ўсходу. Яны спрабавалі патрапіць у Вялікабрытанію праз тунэль пад Ла-Маншам. У верасьні прэзыдэнт Францыі Франсуа Алянд абвясьціў пра дэмантаж лягера. Мігрантаў разьмяркуюць па розных частках краіны, дзе яны змогуць падаць прашэньне на атрыманьне прытулку.