Абама сказаў, што зьверне дадатковую ўвагу на зьвязаныя з наркагандлем пазасудовыя забойствы на Філіпінах, якія абураюць праваабаронцаў.
Аднак спадар Дутэртэ, з санкцыі якога адбываюцца забойствы наркагандляроў, сказаў, што калі гэта адбудзецца, то ён публічна назаве яго лаянкавым выразам «Putang ina» (сукін сын).
Замест прэзыдэнта Філіпінаў лідэр ЗША сустрэнецца цяпер з прэзыдэнтам Паўднёвай Карэі.
Сустрэча адбудзецца ў Лаосе ў рамках саміту Асацыяцыі дзяржаваў Паўднёва-Ўсходняй Азіі.
Прэзыдэнт Дутэртэ, які прыйшоў да ўлады ў чэрвені гэтага году, узяў жорсткую лінію ў барацьбе з наркагандлем.
З тых часоў на Філіпінах былі забітыя каля 2400 падазраваных у гандлі наркотыкамі.
Ён назваў «грубымі» спробы амэрыканскага прэзыдэнта ўмешвацца ў яго палітыку.
«Кампанія супраць наркотыкаў будзе працягвацца. Многія людзі памруць, многіх заб’юць, пакуль на вуліцах не застанецца ніводнага дылера... мы будзем працягваць, пакуль ня будзе забіты апошні вытворца», — сказаў спадар Дутэртэ.
Раней ён ужо ўжываў лаянкавыя словы на адрас іншых публічных асобаў.
Папу Францішка прэзыдэнт Дутэртэ таксама называў «сукіны сынам», дзяржсакратара Джона Керы — «вар’ятам», а амбасадара ЗША на Філіпінах — «гомасэксуальным сукіным сынам».
Карэспандэнты кажуць, што такія калярытныя фармуляваньні добра ўспрымаюцца яго выбарнікамі, аднак могуць дорага абысьціся спадару Дутэртэ на міжнароднай арэне.