Улады францускага гораду Каны ад сёньняшняга дня забаранілі праносіць на пляжы торбы вялікага памеру.
Як паведамляе Reuters, рашэньне прынятае ў рамках працягнутага ў Францыі рэжыму надзвычайнага становішча. Пад забарону трапілі непразрыстыя торбы вялікага памеру, а таксама заплечнікі і чамаданы, у якіх могуць знаходзіцца «небясьпечныя рэчывы, зброя альбо выбухоўка».
Ад парушальнікаў запатрабуюць пакінуць пляж. У дачыненьні да іх можа быць складзены адміністрацыйны пратакол.
Мэр Канаў Давід Ленар заявіў, што забарона будзе дзейнічаць да 31 кастрычніка.
14 ліпеня ў Ніцы ў натоўп урэзаўся грузавік, у выніку 84 чалавекі загінулі і больш як 400 параненыя. Адказнасьць за тэракт узяла на сябе групоўка «Ісламская дзяржава».