Восем эўрапейскіх краін, якія не ўваходзяць у Эўразьвяз, па прыкладзе ЭЗ зьнялі санкцыі са 170 беларускіх чыноўнікаў і трох кампаніяў.
Пра гэта гаворыцца ў заяве кіраўніка дыпляматыі ЭЗ Фэдэрыка Магерыні.
«Краіны-кандыдаты на ўступленьне ў ЭЗ — Македонія, Чарнагорыя, Сэрбія і Альбанія, патэнцыйны кандыдат Босьнія і Герцагавіна, а таксама Ісьляндыя, Ліхтэнштэйн і Нарвэгія далучаюцца да рашэньня Рады ЭЗ. ЭЗ прымае да ведама і вітае гэтую прыхільнасьць», — цытуе ТАСС заяву Магерыні.
Тэкст заявы быў распаўсюджаны 15 красавіка ў Брусэлі, але пакуль афіцыйна не апублікаваны.
15 лютага гэтага году Рада Эўразьвязу на пасяджэньні міністраў замежных спраў вырашыла адмяніць большую частку санкцыяў супраць беларускага рэжыму.