На СМІ ў дзяржаўным бюджэце на 2016 год прадугледжана каля 45 мільёнаў эўра (900 120 843,0 тыс. руб).
Гэта вынікае з праекту закону «Аб рэспубліканскім бюджэце на 2016 год», апублікаваным на сайце Міністэрства фінансаў, паведамляе прэсавая служба Беларускай асацыяцыі журналістаў.
На тэлебачаньне і радыёвяшчаньне прадугледжана каля 36,6 мільёна эўра (734 815 075,0 тыс. руб), на пэрыядычны друк і выдавецтвы — каля 3,5 мільёна эўра (69 154 793,0 тыс. руб), на «іншыя пытаньні ў галіне СМІ» — 4,7 мільёна эўра (96 150 975,0 тыс. руб).
Нацыянальная дзяржтэлерадыёкампанія атрымае зь бюджэту каля 34 мільёнаў эўра, міждзяржаўная тэлерадыёкампанія «Мір» — каля 2,7 мільёна, ЗАТ «Другі нацыянальны тэлеканал» (АНТ) — каля 1,7 мільёна, ЗАТ «Сталічнае тэлебачанне» (СТВ) — каля 1,2 мільёна.
Раней пастановай ураду № 966 ад 19 лістапада 2015 году было вызначана 26 дзяржаўных газэт і часопісаў, якія атрымаюць дапамогу з рэспубліканскага бюджэту ў 2016 годзе: «Алеся», «Беларускі гістарычны часопіс», «Беларусь. Belarus», «Белорусская нива», «Бярозка», «Вместе!», «Вожык», «Вясёлка», «Журнал специального назначения», «Звязда» (дадаткі «Чырвонка. Чырвоная змена», «Местное самоуправление», «Союз-Евразия»), «Здравоохранение», «Знамя юности», «Зорька», «Культура», «Літаратура і мастацтва», «Маладосць», «Мастацтва», «Народная асвета», «Народная газета», «Нёман», «Полымя», «Родная прырода», «Рэспубліка», «Советская Белоруссия», «Спортивная панорама», «The Minsk Times» (дадатак «Голас Радзімы»).
Для параўнаньня: у 2015 годзе на СМІ ў бюджэце было прадугледжана каля 60 мільёнаў эўра (каля 804 млрд рублёў), у 2014 — каля 52 мільёнаў эўра.
Да таго ж, ад работнікаў бюджэтнай сфэры патрабуюць у абавязковым парадку здаваць грошы на падпіску на дзяржаўныя СМІ. Так, маладыя спэцыялісты-пэдагогі, далёка не самыя высокааплатная катэгорыя з заробкамі ў 3–3,5 мільёна рублёў, павінны здаць па 260 тысяч на падпіску для школы выданьняў «СБ —Беларусь сегодня», «Настаўніцкая газета», «Юный спасатель».