Сустрэча прэзыдэнта Расеі Ўладзіміра Пуціна і дзяржсакратара ЗША Джона Керы адбылася ў сочынскай рэзыдэнцыі «Бачароў ручай».
На сустрэчы Керы і Пуціна прысутнічаў кіраўнік Міністэрства замежных спраў Расеі Сяргей Лаўроў, які перад гэтым правёў перамовы з амэрыканскім дзяржсакратаром. Вынікі іх кіраўнік расейскага зьнешнепалітычнага ведамства ацаніў адным словам — «Цудоўна».
Дзяржсакратар ЗША ў сваім афіцыйным твітэры напісаў: «У мяне адбыліся шчырыя перамовы з прэзыдэнтам Пуціным і кіраўніком МЗС Лаўровым па ключавых пытаньнях, у тым ліку — па перамовах з Іранам, па Сірыі і Ўкраіне».
Сустрэча з Пуціным адбывалася за зачыненымі дзьвярыма.
Гэта першы візыт Керы ў Расею пасьля эскаляцыі крызысу ва Ўкраіне. Папярэдні візыт ён зрабіў у 2013 годзе.
Напярэдадні перамоваў з Керы Пуцін заявіў на сустрэчы з кіраўнікамі абароннай прамысловасьці, што адным з галоўных прыярытэтаў Расеі зьяўляецца падтрыманьне тэмпаў мадэрнізацыі ўзброеных сілаў.