Колькасьць загінулых пры выбуху на шахце ў Данецкай вобласьці ўзрасла да 33-х, паведаміў сайт адміністрацыі рэгіёну.
Пракуратура Данецкай вобласьці заявіла, што распачатая крымінальная справа па артыкуле «парушэньне правілаў бясьпекі».
У сераду раніцай на шахце імя Засядзькі адбыўся выбух газава-мэтанавай сумесі. Прадпрыемства знаходзіцца на тэрыторыі, якая падкантрольная сэпаратыстам. Прэм’ер-міністар Украіны Арсеній Яцанюк заявіў, што прадстаўнікі самаабвешчанай «Данецкай народнай рэспублікі» не пусьцілі 60 украінскіх выратавальнікаў на аварыйную шахту. Яцанюк заклікаў Расею «распарадзіцца прапусьціць на месца аварыі ўкраінскіх адмыслоўцаў». У кіраўніцтве ДНР пазьней заявілі, што не атрымлівалі прапанову пра дапамогу ад Кіева.
З канца 90-х гадоў на шахце імя Засядзькі ў выніку некалькіх аварый загінулі больш за 200 гарнякоў. Пасьля сэрыі выбухаў у лістападзе 2007 года тагачасны прэзыдэнт Украіны Віктар Юшчанка выступіў з прапановай зачыніць аварыйную шахту. Аднак супраць гэтага выступіў Віктар Януковіч, які на той момант займаў пасаду кіраўніка ўкраінскага ўраду.