Рэйтынгавае агенцтва Standard & Poor’s панізіла сувэрэнны крэдытны рэйтынг Расеі. Па абавязацельствах у валюце рэйтынг знаходзіцца на ўзроўні BB +. Далейшы прагноз застаецца нэгатыўным.
Да гэтага на працягу дзевяці месяцаў рэйтынг Расеі быў на адну прыступку вышэйшы — на ўзроўні BBB-, які гаворыць аб дастатковай здольнасьці выконваць абавязацельствы. Зьніжэньне да BB + перавяло ацэнку надзейнасьці Расеі з пункту гледжаньня крэдытораў з «інвэстыцыйнай» катэгорыі ў «спэкуляцыйную». На практыцы гэта азначае пераход рэйтынгу дзяржавы для інвэстараў са спрыяльнага для ўкладаньня грошай у неспрыяльны. У дзелавой асяродзьдзі такі рэйтынг называюць «сьмецьцевым».
Адразу пасьля аб’явы аб новым рэйтынгу рэзка апусьціўся рынкавы курс рубля — з 66,40 да 68,50 — 69 рублёў за даляр ЗША.
У апошні раз рэйтынг Расейскай Фэдэрацыі па абавязацельствах у замежнай валюце знаходзіўся на ўзроўні BB + роўна 11 гадоў таму, да канца студзеня 2004 году. З тых часоў ён рос аж да канца 2008 году. Затым, пасьля невялікага зьніжэньня, ён заставаўся стабільным — да падзеяў ва Ўкраіне. У пачатку сёлетняга году рэйтынгі РФ таксама панізіла агенцтва Fitch. Паводле вэрсіі гэтай кампаніі, Расея пакуль не перайшла рысу «сьмецьцевага рэйтынгу», аднак прагноз Fitch з гэтай нагоды таксама нэгатыўны.
Трэці буйны гулец рынку прагнозаў, Moody’s, пакуль не аб’яўляла аб зьмене сваёй ацэнкі плацежаздольнасьці Расеі.