Роўна два месяцы таму Міхаіл Марыніч нечакана заявіў, што будзе змагацца за пасаду прэзыдэнта Беларусі. А сёньня напачатку паседжаньня прэсавага клюбу Беларускай асацыяцыі журналістаў ён прызнаўся:
(Марыніч: ) "Я ня буду крывіць душой і скажу вам шчыра: я не зьбіраўся ісьці ў прэзыдэнты. Але я зьбіраўся зрабіць так, каб з асяродку вэртыкальшчыкаў зьявіўся кандыдат на прэзыдэнта, каб такім чынам паказаць, што ня ўся вэртыкаль падтрымлівае Лукашэнку. На жаль, мне давялося ісьці самому. Я не магу раскрываць падрабязнасьці маёй перадвыбарчай кампаніі, але хачу сказаць, што вылучэньне кандыдата ад вэртыкальшчыкаў адбылося".
Міхаіл Марыніч заявіў, што дзьве траціны прадстаўнікоў выканаўчай улады, кіраўнікоў прадпрыемстваў, а таксама буйны бізнэс не падтрымаюць 9 верасьня кандыдатуру Аляксандра Лукашэнкі. Спадар Марыніч таксама чарговы раз адкінуў абвінавачаньні ў тым, што ён нібыта арганізаваў разам з Уладзімерам Ярмошыным і Міхаілам Мясьніковічам змову супраць Лукашэнкі. Паводле словаў спадара Марыніча, ён ня вёў з гэтымі чыноўнікамі ніякіх перамоваў, але ведае, што і Ярмошын, і Мясьніковіч ухваляюць ягоныя апошнія дзеяньні.
Міхаіл Марыніч выказаў сваю думку адносна шанцаў Аляксандра Лукашэнкі і Ўладзімера Ганчарыка:
(Марыніч: ) "Я ацэньваю сёньняшнюю сытуацыю, як кажуць, пяцьдзясят на пяцьдзясят зь невялікай перавагай адзінага кандыдата. Але я разумею, як нам будзе нялёгка ня даць сфальсыфікаваць выбары. Уладзе не патрэбныя празрыстыя выбары. Для іх гэта катастрафічна.
Калі выбары будуць сфальсыфікаваныя, вынікі іхныя прызнаюць несапраўднымі. Хопіць, што ў нас парлямэнт нелегітымны. А калі стане яшчэ і прэзыдэнт, я думаю, што эўрапейская супольнасьць не захоча мірыцца з такім становішчам. І будзе ўведзенае эмбарга супраць Беларусі".
Як вынік, паводле словаў спадара Марыніча, рэзка пагоршыцца эканамічная сытуацыя, і людзі выйдуць на вуліцы з патрабаваньнем адстаўкі Лукашэнкі.
Паводле словаў Міхаіла Марыніча, ягоныя перамовы з афіцыйнымі асобамі ў Маскве сьведчаць, што Расея хоча бачыць на пасадзе прэзыдэнта Беларусі не Аляксандра Лукашэнку.