РАМАЛА. Новы ўрад Палестынскай Аўтаноміі пад кіраўніцтвам Ахмэда Курэя распачне сёньня сваю працу.
Кандыдатуры 26 міністраў новага кабінэту мусяць быць ухваленыя палестынскім парлямантам, а пазьней яны прыймуць прысягу ў прысутнасьці лідэра Аўтаноміі Ясэра Арафата.
Стварэньне новага кабінэту скончыць палітычны крызіс, які цягнецца ад верасьня, калі былы прэм’ер-міністар Махмуд Аббас зыйшоў у адстаўку з-за канфлікту з Арафатам у справе кантролю над палестынскімі службамі бясьпекі.
Паводле назіральнікаў, галоўная задача цяперашняга ўраду – правесьці перамовы з палестынскімі ўзброенымі групоўкамі і з
Ізраілем каб вярнуцца да выкананьня пляну блізкаўсходняга ўрэгуляваньня “дарожная мапа”.
