БАГДАД. Гішпанія скарачае колькасьць супрацоўнікаў сваёй амбасады ў Багдадзе з-за складанай сытуацыі ў Іраку.
Пра гэта заявіла сёньня міністар замежных справаў Гішпаніі Ана Паласіё. Спадарыня міністар аднак падкрэсьліла, што гэта часовыя захады і супрацоўнікі амбасады праз пэўны час вернуцца ў ірацкую сталіцу.
Гішпанія трэцяй пасьля Нідэрляндаў і Баўгарыі скарачае штат сваіх дыпляматычных супрацоўнікаў у Багдадзе.
Між тым сёньня ў ірацкай сталіцы загінуў амэрыканскі вайсковец, а яшчэ два былі параненыя ў выніку выбуху бомбы. Яшчэ адзін жаўнер ЗША быў забіты самаробнай бомбай кала гораду Тікрыт.
Таксама ад бомбы загінулі два іракцы ў горадзе Карбала.
Напярэдадні прэзыдэнт ЗША Джордж Буш заявіў, што Злучаныя Штаты, нягледзячы на замахі, не пакінуць Ірак пакуль там не запануе стабільнасьць.
Між тым ўчора ў Вашынгтоне Сэнат канчаткова зацьвердзіў выдзяленьне 87,5 мільярдаў даляраў на адбудову Іраку і Афганістану.
